AQSh prezıdenti Donald Tramp qorǵanys mınıstri Pıt Hegsetten oq-dárilerdiń eleýli tapshylyǵyna qatysty túsinikteme talap etti. Bul tapshylyq AQSH-tyń Iranǵa qatysty áskerı múmkindikterin shekteýi múmkin, dep habarlaıdy infohub.kz saıty.
Washington Post gazetiniń habarlaýynsha, Aq úı basshysy áskerı qorlardyń jaı-kúıi týraly ony adastyrǵanyna narazylyq bildirgen. Bul oqıǵa Kemp-Devıdtegi mınıstrler kabınetiniń otyrysynda bolǵan.
Tramp oq-dári tapshylyǵy máselesi sheshildi dep oılaǵan, alaıda uzaq qashyqtyqqa ushatyn basqarylatyn zymyrandar men áýe shabýylyna qarsy qorǵanys quraldarynyń tapshylyǵy týraly derekterge tap bolǵan. Derekkózderdiń aıtýynsha, dál osy qarý-jaraq tapshylyǵy Iranǵa soqqy berýden bas tartýǵa sebep bolǵan.
Qorǵanys mınıstri Pıt Hegsettiń ózi bolsa, qalyptasqan jaǵdaıǵa orynbasary Stıven Faınbergti kinálap, onyń prezıdentke qorlardyń jaı-kúıi týraly tolyq aqparat bermegenin málimdegen.
Eske salaıyq, shilde aıynyń sońynda Pıt Hegset Iranmen qaqtyǵys shyǵyndary 37,5 mlrd dollardy quraǵanyn habarlaǵan. Sonymen qatar, CNN derekteri boıynsha, AQSh osy qaqtyǵys barysynda zymyranǵa qarsy qorǵanys júıeleri qorynyń shamamen 80 paıyzyn jumsaǵan.