AQSh prezıdenti Donald Tramp pen Qytaı Halyq Respýblıkasynyń tóraǵasy Sı Szınpın Vashıngtonda úsh kún boıy saýda jáne ekijaqty qatynastardyń basqa da daýly máselelerin talqylady. Alaıda kelisimderdiń naqty parametrlerin amerıkan tarapy dúısenbide ǵana jarıalaıtynyn ýáde etti, dep habarlaıdy infohub.kz saıty.
Samıttiń sońǵy kúninde eki kóshbasshy Aq úıde shaı ishti. Tramp kelissózderde ilgerileýshilik bar ekenin málimdep, Qytaı amerıkandyq aýyl sharýashylyǵy ónimderiniń óz naryǵyna qoljetimdiligin keńeıtetinin meńzedi, biraq naqty sharttardy atamady.
«Meniń oıymsha, fermerlerimiz rıza bolady», — dedi AQSh prezıdenti.
Sı Szınpın óz kezeginde AQSH-pen qarym-qatynasty syndarly dep sıpattap, olar ózara qurmet, ádildik jáne ózara tıimdilik negizinde damyp kele jatqanyn málimdedi.
Saýda kelisimderi týraly belgilisi — AQSh saýda ókili Djeımıson Grır taraptardyń keıbir taýarlardy saýda daýlarynan shyǵarý týraly sheshim qabyldaǵanyn habarlady. Ol Qytaıǵa amerıkandyq aýyl sharýashylyǵy ónimderi men medısınalyq jabdyqtardy jetkizýdi, sondaı-aq AQSH-qa tutyný jáne basqa da taýarlardy ákelýdi atap ótti. Qol jetkizilgen kelisimderdiń egjeı-tegjeıin Grır dúısenbide jarıalaıtynyn ýáde etti.
Tramp sondaı-aq amerıkandyq fermerler men mal ósirýshilerdiń qytaı naryǵyna qoljetimdiligin keńeıtý týraly aıtty. Eki kóshbasshy da jasandy ıntellektti yqtımal yntymaqtastyq salasy dep atady.
Sonymen qatar Sı Szınpın AQSH-ty Taıvan máselesine abaılap qaraýǵa shaqyrdy. Pekın sondaı-aq aralǵa amerıkandyq qarý-jaraq jetkizýdi toqtatýǵa umtylýda. Jeltoqsanda Tramp ákimshiligi 11 mıllıard dollarlyq qarý-jaraq paketin maquldaǵan, biraq quny shamamen 14 mıllıard dollar bolatyn basqa paket boıynsha sheshim ázirge keıinge qaldyrylǵan.
Shaı ishkennen keıin Tramp Sıge AQSh Ulttyq arhıvin kórsetti. Onda kóshbasshylar Táýelsizdik deklarasıasyn, Konstıtýsıany jáne Quqyqtar týraly bılldi qarap shyqty. Sıdiń aıtýynsha, olar Tramppen jyl sońyna deıin taǵy eki ret kezdesýi múmkin — Qytaıdaǵy ATES samıtinde jáne Maıamıdegi G20-da.
Buǵan deıin «Kýrsıv» Sıdiń ushaǵy 23 qyrkúıekte Vashıngton mańyndaǵy Endrús áýe bazasyna qonǵanyn jazǵan bolatyn. Memlekettik saparmen AQSH-qa kelgen qytaı kóshbasshysy men onyń jubaıy Pen Lıýandi ushaq baspaldaǵynyń janynda prezıdent Donald Tramp pen birinshi hanym Melanıa Tramp qarsy aldy. Taraptar saýda bitimin uzartýǵa keliskeni habarlanǵan.