AQSh prezıdenti Donald Tramp ótken aıda Túrkıanyń Ankara qalasynda ótken NATO samıtinen jasyryn túrde basqa áskerı ushaqpen ushyp ketkeni belgili boldy. Bul týraly The Washington Post gazeti dúısenbi kúni habarlady. Aq úı prezıdenttiń Air Force One ushaǵynda ushyp bara jatqanyn kórsetý úshin arnaıy ádis qoldanǵan.
Basylymnyń málimetinshe, bul áreket Iran tarapynan Trampqa qastandyq jasaý qaýpine baılanysty bolǵan. Jýrnalıser men Aq úı qyzmetkerleriniń bir bóligi prezıdentpen birge ushaqta otyrmyn dep oılaǵan, alaıda olar basqa ushaqta bolǵan. Tramp samıtke Katar syılaǵan jańa ushaqpen barǵan, biraq qaıtar jolda eski úlgidegi Air Force One ushaǵymen ushatynyn aıtqan.
Alaıda The Washington Post-tyń habaryna sáıkes, Tramp eski Air Force One ushaǵyna otyrǵannan keıin birneshe mınýt ishinde jasyryn túrde kishirek ushaqqa — Air Force C-32A-ǵa aýystyrylǵan. Ol úshin áýejaıdaǵy tamaq júkteıtin arnaıy kólik paıdalanylǵan. Tramp Mıldenhollǵa osy kishirek ushaqpen ushqan.
Aq úı bul oqıǵaǵa tikeleı túsinikteme bermegen. Aq úıdiń komýnıkasıalar jónindegi dırektory Stıven Chýng málimdemesinde: «Prezıdenttiń aıtýynsha, Amerıkanyń kóptegen jaýlary ony nysanaǵa alǵan, biz bul qaýipterdi joıý úshin barlyq quraldardy qoldanamyz», — degen. Qupıa qyzmet túsinikteme berýden bas tartqan, al Áýe kúshteri suraqtardy Aq úıge baǵyttaǵan.
Bul jaǵdaı Katar syılaǵan jańa ushaqtyń qaýipsizdigine qatysty suraqtar týǵyzǵan. The New York Times jáne CBS News habarlaýynsha, barlaý qyzmetteri prezıdentke nemese onyń ushaǵyna shabýyl jasalýy múmkin degen alańdaýshylyq bildirgen, sondyqtan qosymsha saqtyq sharalary qabyldanyp, jańa ushaqty qaıtar jolda paıdalanbaý týraly sheshim qabyldanǵan. Tramp bul ushaqqa qosymsha jańartýlar jasalatynyn aıtqan.
Burynǵy Qupıa qyzmet agenti Pol Ekloff mundaı qadamnyń ádetten tys ekenin, biraq buryn-sońdy bolmaǵan dep aıtýǵa bolmaıtynyn jetkizdi. Ol muny naqty barlaý aqparatynyń bolýymen nemese aımaqtaǵy turaqsyzdyqqa baılanysty saqtyq sharasymen túsindirýge bolatynyn aıtty.
The Washington Post-tyń habarlaýynsha, Tramp ushaqtan túsip, arnaıy kólikke otyrǵanda, onymen birge birneshe kómekshisi bolǵan. Jýrnalıserge ushý aldynda tereze perdelerin jabýǵa keńes berilgen. Mıldenhollǵa jetkende Tramptyń ushaqtan túskenin fototilshiler túsirgen, bul onyń Air Force One ushaǵyna qaıta otyrǵanyn kórsetken.
Demokrat senator Rıchard Blúmental bul oqıǵaǵa qatysty kongres tergeýin talap etti. Ol muny «buryn-sońdy bolmaǵan jáne súrealısik» dep atady. Tramp ushaqta jýrnalıserge Iran tarapynan qaýip bar-joǵy týraly suraqqa: «Maǵan únemi qaýip tónip turady. Men olardyń tiziminde birinshimin», — dep jaýap bergen. Ol sondaı-aq: «Biraq men ketsem, sender de ketesińder», — dep qosqan.
Mıldenholldaǵy qysqa vızıtten keıin Tramp jańa Air Force One ushaǵyna otyryp, Vashıngtonǵa ushqan.