Amerıka Qurama Shtattarynyń Prezıdenti Donald Tramp Venesýelany baqylaýǵa alýdyń arqasynda AQSh jaqyn arada ulttyq qorlaryn munaımen tolyqtyratynyn málimdedi, dep habarlaıdy infohub.kz saıty.
Time jýrnalyna bergen suhbatynda Trampqa Venesýela týraly suraq qoıyldy. «Ondaǵy jaǵdaı qalaı bolyp jatyr?» — dep tikeleı surady jýrnalıs.
Suhbattyń stenogrammasyna sáıkes, jýrnalıs Tramptyń Venesýeladaǵy saılaý ótkizý týraly prezıdent mindetin atqarýshy Delsı Rodrıgespen kelisken-kelispegenin bilgisi kelgen.
Tramp Rodrıgespen «jaqsy qarym-qatynasta» ekenin aıtty, sebebi AQSh ol jaqqa iri munaı kompanıalaryn tartyp otyr.
«Biz óte kóp munaı óndiremiz. Jaqynda ulttyq qorlarymyzdy — ulttyq strategıalyq rezervterimizdi toltyramyz. Bizdiń qarym-qatynasymyz óte jaqsy. Prezıdent Býsh (Djordj Býsh-kishi — red. eskertpesi) Irakty talqandaǵanda, bárin jumystan shyǵardy. Eldi basqaratyn eshkim qalmady. Men basqasha jasadym. Men polısıany jumystan shyǵarmadym. Men áskerdi jumystan shyǵarmadym. Men eshkimdi jumystan shyǵarmadym. Al bárin Delsı basqardy. Biz birge jaqsy jumys isteımiz. Tipti qazir de. Onda saılaý ótýi múmkin edi», — dedi Tramp.
Ol Venesýelada prezıdent saılaýynyń ótkenin qalaıtynyn, biraq onyń pikirinshe, ondaǵy jaǵdaı ázirge «shıki» ekenin qosty.
«Menińshe, ázirge erte. Mine, Exxon, Chevron — barlyq iri munaı kompanıalary sonda kirip jatyr. Biz kóp aqsha tabamyz, biraq Venesýela da tabady, al biz osynyń bárin tolyq baqylaımyz», — dep qorytyndylady Tramp.
Eske salaıyq, jaqynda Donald Tramp Venesýelamen «álem tarıhyndaǵy eń úlken» munaı mámilesin jasaǵanyn jarıalaǵan bolatyn.
Keıinirek Venesýelanyń ýaqytsha prezıdenti Delsı Rodrıges ultqa úndeýinde AQSH-pen munaı kelisimi aıasynda eldiń tabysy týraly aıtty. Mámile jasalǵannan keıin Tramp venesýelalyq munaı AQSH-tyń strategıalyq qorlaryn tolyqtyratynyn málimdedi. Ol muny «amerıkalyq halyqqa syı» dep atady.