Ýkraına prezıdenti Vladımır Zelenskı kelesi aptada Vashıngtonǵa baryp, Aq úıde AQSh prezıdenti Donald Tramppen kezdesedi, dep habarlaıdy infohub.kz.
AVS News-tiń Aq úı ókiline silteme jasaýynsha, kezdesý 28 shilde, seısenbi kúni ótedi. Zelenskı sondaı-aq amerıkandyq senator Lındsı Gremmen qoshtasý rásimine qatysady. Grem men Zelenskı arasynda tyǵyz baılanys bolǵany aıtylady. Senator qaıtys bolar aldynda Ýkraınaǵa barǵan edi.
Ýkraına kóshbasshysynyń sapary onyń Reseı men Iran týraly jańa málimdemeleri tusynda belgili boldy. Senbi kúni Zelenskı X áleýmettik jelisinde ýkraınalyq arnaıy qyzmetterge odaqtastarǵa barlaý aqparatyn berýdi tapsyrǵanyn habarlady. Onyń aıtýynsha, bul derekter Reseıdiń AQSh pen Iran arasyndaǵy jalǵasyp jatqan qaqtyǵys kezinde Iranǵa kómekteskenin kórsetedi. Zelenskıdiń málimdeýinshe, shildeniń basynan bastap ýkraınalyq tarap Reseıdiń Parsy shyǵanaǵyndaǵy AQSh odaqtastarynyń nysandary men aımaqtaǵy amerıkan áskerı bazalaryn spýtnıktik barlaýyn baıqaǵan. Ol bul derekter men Irannyń keıingi soqqylary arasynda «aıqyn baılanys» baryn málimdedi.
Aq úı bul málimdemelerge áli túsinikteme bermedi jáne Ýkraına prezıdenti aıtqan barlaý derekterin amerıkandyq bılik alǵan-almaǵanyn rastaǵan joq. Aldyńǵy kúni Donald Tramp jýrnalıserdiń suraqtaryna jaýap bere otyryp, Reseı men Qytaı Iranǵa aıtarlyqtaı kómek kórsetedi dep oılamaıtynyn aıtty. Onyń sózinshe, QHR tóraǵasy Sı Szınpın men Reseı prezıdenti Vladımır Pýtın ony Tegerandy «eleýli kólemde» qoldaýǵa nıetti emes ekenine sendirgen.
Buǵan deıin Qazaqstan prezıdenti Qasym-Jomart Toqaev Qazaqstan men Reseıdiń XXII óńiraralyq yntymaqtastyq forýmyna qatysyp, onda Vladımır Pýtınge «Ýkraınadaǵy qaqtyǵysty muzdatyp, «Stambýl formýlasy 2.0»-ge oralýdy» usynyp, rezonansty málimdeme jasady. Osy úshin Ýkraına syrtqy ister mınıstri Andreı Sıbıga qazaqstandyq kóshbasshyǵa alǵys bildirdi. Keıin Reseı prezıdentiniń baspasóz hatshysy Dmıtrı Peskov muzdatý usynysyn júzege asyrý múmkin emes dep málimdedi.