Qazaqstanda Kaspı teńiziniń túbimen Ázirbaıjan men Qazaqstandy sıfrlyq arterıamen jalǵaǵan Transkaspı talshyqty-optıkalyq baılanys jelisin (TOBJ) tartýdyń negizgi kezeńi aıaqtaldy, dep habarlaıdy infohub.kz saıty.
Sý asty kabeli Qazaqstan jaǵalaýyna jetti, bul jobanyń eń kúrdeli bóliginiń aıaqtalǵanyn bildiredi. Jobany «Qazaqtelekom» jáne AzerTelecom International kompanıalary júzege asyrýda. Aqtaý — Sýmǵaıyt jańa baǵyty Azıa men Eýropa arasyndaǵy derekterdi berýdiń tikeleı joǵary jyldamdyqty dálizine aınalady. Joba halyqaralyq baılanystyń senimdiligin arttyrýǵa jáne eki eldiń tranzıttik áleýetin nyǵaıtýǵa baǵyttalǵan.
Teńiz kezeńiniń aıaqtalýyna baılanysty kabel tartatyn keme bortynan vıse-premer — II jáne sıfrlyq damý mınıstri Jaslan Madıev, «Qazaqtelekom» basshysy Baǵdat Mýsın jáne AzerTelecom International bas dırektory Ana Nakashıdze jumys barysymen tanysty.
«Jańa baǵyt Qazaqstannyń álemdik derekter berý jelilerimen sıfrlyq baılanysyn nyǵaıtyp, II, bultty tehnologıalar men zamanaýı derekterdi óńdeý ortalyqtaryn odan ári damytýǵa negiz qalaıdy», — dep atap ótti Jaslan Madıev.
Qazir kabeldi jaǵalaý ınfraqurylymyna qosý jumystary júrgizilýde. Kúzde jer ústi ınfraqurylymynyń qurylysyn aıaqtaý, iske qosý-retteý jumystaryn júrgizý jáne júıeni testileý josparlanýda. Magıstraldyń qurylysy men odan ári paıdalanýyna «Qazaqtelekom» men AzerTelecom International birlesken kásiporny CaspiLink B.V. jaýapty bolady.
Joba 2025 jyly bastaldy. Aldymen mamandar ınjenerlik zertteýler júrgizip, ońtaıly baǵytty anyqtap, kabeldi synaqtan ótkizdi. Teńizde tartý jumystary 2026 jyldyń shildesinde bastaldy. Jumystar sý yǵystyrýy 20 myń tonnadan asatyn arnaıy kemeniń kómegimen táýlik boıy júrgizildi. Jobaǵa 70 maman tartyldy.
Joba operatorlardyń menshikti qarajaty esebinen, búdjet qarjysyn tartpaı júzege asyrylýda.