BBC Radio 2 dıdjeıi Trevor Nelson mı isigi dıagnozy qoıylǵannan keıin ota jasatqanyn jáne qazir jazylyp kele jatqanyn aıtty. 62 jastaǵy júrgizýshi maýsym aıynda densaýlyǵyna baılanysty jumystan ýaqytsha demalysqa shyǵatynyn málimdegen edi. Beısenbidegi jazbasynda Nelson mı isigi bar ekenin bilgende «álemi tóńkerilgenin» aıtty.
Radıo júrgizýshisi sońǵy bir aıdy «qalpyna kelý, demalý jáne jazylý» úshin ótkizgenin, otanyń «óte sátti» ótkenin jáne jaqyn arada jumysqa oralýǵa úmittenetinin bildirdi. Brıtandyq qara násildiler mýzykasyn nasıhattaýǵa 30 jyl ómirin arnaǵan Nelson beıneúndeýinde: «Kópshiligiń jaz basynda jazǵan jazbamdy kórgen shyǵarsyńdar, onda aýrýyma baılanysty barlyq jumystan qol úzip turǵanymdy aıtqanmyn. Meniń ne bolǵanym týraly kóptegen boljamdar aıtyldy, men ony bilemin», — dedi.
Brain Tumour Charity uıymynyń málimetinshe, Ulybrıtanıada jyl saıyn shamamen 13 000 adamǵa mı isigi dıagnozy qoıylady. Nelson: «Qazir bárin aıtyp jatpaımyn, keıinirek tolyq aıtyp berermin, sonda búkil oqıǵany estısizder. Biraq mynany aıtaıyn: men óz isimmen júrgen edim, kenetten mı isigi bar ekeni anyqtaldy. Álemim tóńkerildi. Bul maǵan da, jaqyndaryma da, dostaryma da soqqy boldy. Basym aınalyp ketti», — dedi.
Júrgizýshi dıagnoz qoıylǵannan birneshe apta ótken soń ota jasatqanyn aıtty. «Baqytyma oraı, ota óte sátti ótti, sońǵy bir aı boıy úıde bolyp, demalyp, jazylyp, otadan keıingi em alyp júrmin», — dedi ol. Ol ózin «qaıtadan ózimdeı sezinip turǵanyn» aıtyp: «Meniń jaǵdaıym óte aýyr boldy, biraq qazir odan aman shyqtym jáne ózimdi tamasha sezinemin. Jumysqa kirisýge daıynmyn, densaýlyǵym jaqsy», — dep qosty.
Nelson demalysqa deıin Radio 2-de apta ishinde saǵat 14:00-16:00 aralyǵynda, al BBC Radio 1Xtra-da jeksenbi saıyn saǵat 11:00-13:00 aralyǵynda júrgizip kelgen. Ol buǵan deıin Kiss FM, Radio 1 jáne MTV-de jumys istegen.