AQSh prezıdenti Donald Tramp Folklend araldaryna qatysty AQSh ustanymy qaıta qaralyp jatqan «kóptegen máselelerdiń biri» ekenin aıtyp, Ulybrıtanıany áskerı shyǵyndardy kóbeıtýge shaqyrdy. Bul týraly infohub.kz habarlaıdy.
Tramp Ulybrıtanıanyń qorǵanys búdjetin kóterý qajettigi týraly suraqqa jaýap bere otyryp, Folklend araldaryna qatysty pikirin bildirdi. Keıin ol qorǵanys qarjylandyrýy týraly qosymsha suraqqa: «Ulybrıtanıada keıbir problemalar bar, biraq olar sheshiledi», — dedi.
Buǵan deıin The Daily Telegraph gazeti AQSh qorǵanys vedomstvosy NATO odaqtastaryn óz mindettemelerin oryndaýǵa yntalandyrý josparyn ázirlep jatqanyn, onyń ishinde Folklend araldaryna qatysty Ulybrıtanıanyń egemendigine qarsy shyǵý qaýpi bar ekenin jazǵan bolatyn.
Ulybrıtanıa úkimeti buǵan jaýap retinde Folklend araldarynyń turǵyndary «óz taǵdyryn ózi sheshýge quqyǵy bar brıtandyqtar» ekenin málimdedi. Úkimet ókili: «Aral turǵyndary Ulybrıtanıanyń teńiz arǵy aımaǵy bolyp qalý tilegin birneshe ret bildirdi, bizdiń olarǵa degen adaldyǵymyz ózgermeıdi», — dedi.
Ońtústik-batys Atlant muhıtynda ornalasqan Folklend araldary Ulybrıtanıa men Argentına arasyndaǵy daýly aýmaq bolyp qala beredi. 1982 jyly eki el arasynda osy aýmaq úshin qysqa, biraq qandy soǵys boldy. Brıtandyq áskerı kúshter Folklend araldaryna óz terıtorıalyq talaptaryn bildirý úshin kelgen Argentına áskerlerin qýyp shyqty.
74 kúnge sozylǵan qaqtyǵysta 255 brıtandyq áskerı qyzmetker, úsh aral turǵyny jáne 649 argentınalyq sarbaz qaza tapty.
AQSH-tyń burynǵy ákimshilikteri araldardaǵy Ulybrıtanıanyń is júzindegi basqarýyn resmı túrde moıyndaǵan, biraq egemendik máselesi boıynsha resmı ustanym bildirmegen.
Dúısenbide jýrnalıserge sóılegen Trampqa BBC ókili AQSH-tyń Folklend araldaryna qatysty ustanymyn qaıta qarap jatqanyn surady. Prezıdent: «Men árqashan barlyq ustanymdy qaıta qaraımyn. Bul — solardyń biri ǵana», — dep jaýap berdi.
Sáýirde Reuters agenttigi taratqan Pentagonnyń ishki elektrondyq hatynda AQSh Irandaǵy soǵysty qoldamady dep sanaǵan NATO odaqtastaryna jaza qoldaný nusqalaryn qarastyryp jatqany aıtylǵan. Nusqalardyń ishinde Folklend araldaryna qatysty Ulybrıtanıanyń talabyn qaıta qaraý múmkindigi de bolǵan.