AQSH-taǵy aralyq saılaýǵa bir aıdan az ýaqyt qalǵanda, Donald Tramp ákimshiligi Joǵarǵy sotqa poshta arqyly daýys berýge qatysty shekteýlerdi qalpyna keltirý týraly ótinishin qaıta joldady. Buǵan deıin federaldy sýdıa jańa shekteýlerdiń kúshin joıǵan edi, dep habarlaıdy infohub.kz saıty.
Jeksenbi kúni Joǵarǵy sotqa jiberilgen qujatta bas prokýrordyń orynbasary Djon Saýer AQSh poshta qyzmetine (USPS) Tramptyń atqarýshy buıryǵyn oryndaýǵa tyıym salatyn sot sheshimine qarsy shyqty. Bul sheshimdi federaldy okrýgtik sýdıa Indıra Talvanı juma kúni uzartqan bolatyn.
Daýys berý búletenderi ártúrli shtattarda poshta arqyly jiberile bastaǵandyqtan, ákimshiliktiń erejelerge ózgeris engizýge ýaqyty az. Saýerdiń ótinishinde atap ótilgendeı, Soltústik Karolınada búletender jiberile bastady, al Alabamada 9 qyrkúıekte, taǵy bes shtatta 13 qyrkúıekte bastalady. Ol sot tyıymy kúshinde turǵan kezde árbir kún saılaý prosesinde shatasý men haos týdyrýy múmkin ekenin, sebebi daıyndyq sharalary mindetti emes, erikti bolyp qalatynyn jetkizdi.
Bul — ákimshiliktiń Joǵarǵy sottan daýǵa aralasýdy suraǵan úshinshi áreketi. Sot buǵan deıin jospardy júzege asyrýǵa ruqsat bergen, biraq onyń zańdylyǵy týraly sheshim shyǵarmaǵan.
Bul daýdyń nátıjesi bıylǵy saılaýǵa aıtarlyqtaı áser etýi múmkin, óıtkeni Kongrestegi baqylaý talasqa túsip tur. AQSh saılaýshylarynyń shamamen úshten biri poshta arqyly daýys beredi.
AQSh prezıdenti naýryz aıynda atqarýshy buıryqqa qol qoıǵan bolatyn. Bul buıryq USPS-ke árbir shtatta daýys berýge quqyǵy bar azamattardyń federaldy tizimine enbegen saılaýshylarǵa búletenderdi jetkizýge tyıym salady. Mundaı tizimdi İshki qaýipsizdik departamenti (DHS) júrgizedi. Nátıjesinde búletender tek maquldanǵan tizimdegi saılaýshylarǵa ǵana jetkiziledi.
Demokratıalyq shtattar men saılaýshylardyń quqyǵyn qorǵaıtyn toptar bul ózgeristerdi konstıtýsıaǵa qaıshy dep sanaıdy. Al saılaýdy ótkizetin shtattyq laýazymdy tulǵalar jańa federaldy talaptardy oryndaý úshin júıelerin ózgertýge ýaqyt jetkiliksiz ekenin aıtady.
Tramp ákimshiligi poshta arqyly daýys berýdi shekteý josparyn «aqylǵa qonymdy sharalar» dep ataıdy jáne ony saılaý qaýipsizdigin qamtamasyz etýmen túsindiredi. Al bul jospardyń kúshin joıý týraly sot sheshimin «negizsiz jáne zańsyz» dep sanaıdy.
Tramp buǵan deıin de poshta arqyly daýys berýdi shekteýge birneshe ret tyrysqan, degenmen ózi bul ádisti jıi qoldanǵan. Ol 2020 jylǵy saılaýdaǵy jeńilisin poshta arqyly daýys berýmen baılanystyryp, alaıaqtyq týraly negizsiz aıyptaýlardy alǵa tartqan.
USPS óz kezeginde, eger sot tyıymdary alynyp tastalsa, Tramptyń jańa shekteýlerin engizýge daıyn ekenin málimdedi. Bul shekteýler federaldy saılaýlarda shtattardan poshta arqyly jiberiletin búletenderge baılanysty ataýlar men shtrıh-kodtardy poshta qyzmetine berýdi talap etedi.