Mal jaıý erejesin buzý jylqy ıesine jarty mıllıon teńgeden astamǵa tústi: Shý aýdandyq soty ıesin janýardyń jolaýshylar poezymen soqtyǵysýynan keltirilgen zalaldy óteýge mindettedi, dep habarlaıdy infohub.kz saıty.
Jambyl oblysynyń Shý aýdandyq soty «K.» JSHS-niń azamat T.-ǵa jolaýshylar poezynyń jylqyǵa soǵylýynan keltirilgen materıaldyq zalaldy óteý týraly talap aryzy boıynsha azamattyq isti qarady.
Tergeý barysynda anyqtalǵandaı, oqıǵa 2025 jyldyń qarasha aıynda Otar – Shý temirjol ýchaskesinde túngi ýaqytta bolǵan. Jolaýshylar poezy qozǵalys kezinde jolǵa kenetten shyǵyp ketken jylqyny qaǵyp ketti. Mashınıst ýaqtyly tótenshe tejeý jasap, qatty dybystyq sıgnal bergenimen, soqtyǵysýdan qutyla almady.
Saldarynan elektrovoz mehanıkalyq zaqym alyp, jóndeýge jiberildi. Qalpyna keltirý jumystarynyń quny 531 myń teńgeni qurady.
Quqyq qorǵaý organdary janýardyń ıesin anyqtady. Onyń buǵan deıin temirjol tóseminiń janynda mal jaıý erejesin buzǵany úshin ákimshilik jaýapkershilikke tartylǵany belgili boldy.
İs materıaldary men usynylǵan dáleldemelerdi zertteı kele, sot jaýapkerdiń mal jaıý erejesin buzýy men lokomotıvke zalal keltirý arasynda tikeleı sebep-saldar baılanysy bar dep sheshti. Talapkerdiń talaptary negizdi dep tanyldy.
Shý aýdandyq sotynyń sheshimimen jaýapkerden «K.» JSHS paıdasyna 531 myń teńge mólsherindegi materıaldyq zalal, sondaı-aq memlekettik baj salyǵyn tóleýge jumsalǵan shyǵyndar óndirildi.
Sotta bul sheshim ázirge zańdy kúshine enbegenin jáne zańnamada belgilengen tártippen shaǵymdanýy múmkin ekenin atap ótti.