Astananyń eki turǵyny túngi ýaqytta turǵyn úılerdiń janynda salút atyp, bes táýlikke qamaýǵa alyndy, dep habarlaıdy infohub.kz.
Birinshi oqıǵa 50 jastaǵy er adamǵa qatysty boldy. Ol bolashaq kelininiń týǵan kúnine oraı qonaq úıdiń janynda feıerverk uıymdastyrǵan. Salút mańaıdaǵy turǵyn úı keshenderiniń turǵyndarynyń tynyshtyǵyn buzǵan. Sot ony usaq buzaqylyq jasady dep tanyp, bes táýlikke qamaýǵa aldy.
Ekinshi jaǵdaıda 26 jastaǵy jigit qyz uzatý rásiminen keıin kópqabatty turǵyn úıdiń janynda salút atqan. Onyń áreketi de qoǵamdyq tártipti buzǵandyqtan, sot oǵan da dál osyndaı jaza taǵaıyndady.
Polısıa turǵyn úılerdiń janynda, ásirese túnde pırotehnıkany atý azamattardyń tynyshtyǵyn buzatynyn jáne qaýipsizdikke qaýip tóndirýi múmkin ekenin eskertti.
«Merekelik sharalar basqalarǵa qolaısyzdyq týdyrmaı, tek jaǵymdy emosıalar ákelýi kerek», — dedi polısıa qyzmetkerleri.
Buǵan deıin «Kýrsıv» 18 jastaǵy qazaqstandyqtyń Audi lúginen salút atqany úshin jazalanǵanyn habarlaǵan bolatyn.