Nevada shtatynyń Las-Vegas qalasynda áıgili reper Týpak Shakýrdyń ólimine qatysty sot prosesi bastaldy. Prokýror Bıný Palaldyń aıtýynsha, bul — burynǵy kóshe bandasynyń jetekshisi Dýeın Devıs uıymdastyrǵan kek alý áreketi. Bul týraly infohub.kz habarlaıdy.
63 jastaǵy Dýeın Devıs 1996 jyly Las-Vegas mańyndaǵy Paradaıs qalasynda bolǵan atysta Týpak Shakýrdyń qazasyna kináli dep aıyptalýda. Prokýratýra Devısti Shakýrdy óltirý áreketiniń «jedel basqarýshysy» bolǵan dep sanaıdy. Alaıda Devıs óz kinásin moıyndamady.
Sol kezde 25 jastaǵy kalıfornıalyq reper qysqa, biraq jarqyn mansabynda hıp-hop janrynyń sımvolyna aınalǵan edi. Onyń álbomdary Billboard charttarynyń kóshin bastap, óliminen keıin de tanymaldylyǵy arta tústi.
İs Klark okrýginiń sotynda qaralýda. Sot prosesi alty aptaǵa deıin sozylýy múmkin. Kýágerler qatarynda sol túni Shakýrmen birge bolǵan Death Row Records kompanıasynyń negizin qalaýshy Merıon «Súdj» Naıt bolýy múmkin. Ol qazir 28 jylǵa bas bostandyǵynan aıyrylǵan.
Prokýror Palal Devıstiń ózi jarıa málimdemeleri arqyly istiń qaıta qozǵalýyna sebepker bolǵanyn aıtty. «Sizder muny Dýeın Devıstiń ózinen bilesizder», — dedi ol. Qorǵaýshy Maıkl Sandt 30 jyldan keıin tergeýshilerdiń isti dáleldeıtin derekteri az ekenin alǵa tartty. «Aqyr sońynda, sizder ózderińizge suraq qoıýyńyz kerek: olardyń aıtqandary shyndyq pa, álde oıdan shyǵarylǵan ba?» — dedi Sandt.
Oqıǵa 1996 jyly 7 qyrkúıekte Las-Vegastaǵy MGM Grand qonaq úıinde bolǵan tóbelesten keıin oryn alǵan. Shakýr jáne onyń serikteri Devıstiń jıenin uryp-soqqan. Qaqtyǵys Los-Andjeles mańyndaǵy eki banda — Devıs ózin jetekshisimin dep sanaıtyn South Side Compton Crips jáne Mob Piru arasyndaǵy arazdyqtan týyndaǵan.
Devıs qarýdy alyp, aq Cadillac kóligindegi eki adamǵa bergen degen boljam bar. Olar Naıt pen Shakýrdyń kóligin qýyp jetkende, oq atylǵan. Shakýr tórt ret jaraqattanyp, alty kúnnen keıin aýrýhanada qaıtys bolǵan. Naıttyń basynan syrǵanap ótken oq synyǵynan jeńil jaraqat alǵan.
Shakýrdyń ólimi 1990-jyldardaǵy «gangsta-rep» mádenıetiniń zorlyq-zombylyq bedelin kúsheıtip, Shyǵys jáne Batys jaǵalaýdaǵy ártister arasyndaǵy básekelestikti órshitti. Bul rep tarıhyndaǵy betburys kezeń boldy.