«Kokshetaýskıe mıneralnye vody» kompanıasy Turan mıneraldy sýyn jáne Haoma markasymen аlkogól ónimderin shyǵarady. Kásiporyn 2025 jyly basshylyǵyna tóleıtin syıaqyny 30,4%-ǵa kóbeıtti. Tólemniń jalpy somasy shamamen 9,8 mln teńgege ósip, byltyrǵy 32,24 mln teńgeden 42,03 mln teńgege jetti, dep habarlaıdy infohub.kz saıty.
Kásiporynnyń teń ıeleriniń biri — Qazaqstan Respýblıkasy Aýyl sharýashylyǵynyń burynǵy vıse-mınıstri Múslım Ómiráev.
Bul qarajatty 2024 jyly da, 2025 jyly da bir adam aldy. Ol — kompanıanyń basqarma múshesi bolyp 2023 jyldyń qyrkúıeginde saılanǵan jalǵyz múshesi Dosymjan Kenjeshov. Onyń syıaqysy orta eseppen aıyna 3,5 mln teńgege jetken.
Kenjeshov basqarmadaǵy jumysynan bólek «Haoma Dıstılerı» kompanıasynyń dırektory qyzmetin atqarady. Bul kásiporyn spırtti ishimdikterdi dıstıllásıalaýmen, rektıfıkasıalaýmen (suıyq qospany jekelegen komponentterge bólý prosesi) jáne aralastyrýmen aınalysady. Bul qurylym tolyǵymen «Kokshetaýskıe mıneralnye vody» kompanıasyna tıesili.
Basshylyqqa tólenetin tólemniń ósýi kásiporynnyń qarjylyq kórsetkishteri jaqsarǵan kezde oryn aldy. 2025 jyldyń qorytyndysy boıynsha «Kokshetaýskıe mıneralnye vody» 1,36 mlrd teńge taza paıda tapty. Bul 2024 jylǵy kórsetkishten (1,17 mlrd teńge) 15,4%-ǵa artyq. Sol kezeńdegi túsim 13,72 mlrd teńgeden 16,56 mlrd teńgege ósti.
«Kokshetaýskıe mıneralnye vody» kompanıasynyń jalǵyz menshik ıesi — «Azıa Sý Kompanıasy». Óz kezeginde, bas kompanıanyń teń ıeleri — Ómiráev jáne burynǵy vıse-premer ári Syrtqy ister mınıstri Murat Nurtileýdiń inisi Shalqar Nurtileý.
Ómiráevqa sondaı-aq Global Beverages, Global Wine KRG, Global Wine AST, Global Wine Aktobe, Global Wine Kostanay, Global Wine2024, Global Wine Almaty, Global Wine Petropavlovsk, «Avrora Pavlodar», Global Wine Uralsk, Saturn Distribution, Global Wine Oskemen, EFG Almaty, Agropark KZ jáne «Nord Fýd Kompanıasy» kompanıalary tıesili.
2014 jyly sot Ómiráevty kásipkerden 100 myń dollar jáne shamamen 7 mln teńge para alǵany úshin, sondaı-aq aýsylǵa qarsy vaksına satyp alý konkýrstarynda jeńiske jetýge járdemdeskeni úshin qatań rejımdegi kolonıada 10 jylǵa bas bostandyǵynan aıyrdy. 2016 jyly is laýazymdyq ókilettikterdi asyra paıdalaný dep qaıta saralanyp, merzim tórt jylǵa qysqartyldy. Keıin jazanyń ótelmegen bóligi bostandyqty shekteýmen almastyrylyp, ol merziminen buryn bostandyqqa shyqty.
Ekinshi teń ıesi Shalqar Nurtileý «Premıým Oıl Trans», Doskar Group, Rail Jet jáne Turan Development QZ kompanıalaryn baqylaıdy.
«Kokshetaýskıe mıneralnye vody» аlkogóldi jáne аlkogólsiz ónimder, onyń ishinde Turan sýyn jáne Xaoma araǵyn shyǵarady.