Túrkistan oblysynyń polıseıleri jeti táýlik boıy kúıeýimen janjaldan keıin tórt balasymen birge úıden shyǵyp ketken áıeldi izdedi. Onyń Shymkentke baryp, týystaryna habarlamaı páter jaldaǵany anyqtaldy, — dep habarlaıdy infohub.kz saıty.
Otyrar aýdanynyń turǵyny polısıaǵa júgindi: onyń áıeli balalarymen birge úıden shyǵyp, bir apta boıy qaıtyp kelmegen. İzdestirý jumystaryna Túrkistan oblysy polısıa departamentiniń uıymdasqan qylmysqa qarsy kúres basqarmasy men Otyrar aýdandyq polısıa bóliminiń qyzmetkerleri jumyldyryldy. Aýdannyń kireberis jáne shyǵaberis joldaryna baqylaý beketteri qoıylyp, kólikter tekserildi, al kórshi aýmaqtarǵa baǵyttamalar jiberildi.
6, 5, 3 jastaǵy jáne 10 aılyq balalary bar áıeldi taksıden taýyp, bólimge jetkizdi. Onyń ketýine kúıeýimen turmystyq janjal sebep bolǵany anyqtaldy: renjip, ol balalary men qujattaryn alyp, eshkimge eshteńe aıtpaı Shymkentke ketip, páter jaldaǵan.
«Jaqyn týystary shaqyrylyp, polısıa qyzmetkerleri profılaktıkalyq túsindirý jumysyn júrgizdi. Otbasy músheleri tatýlasyp, aman-esen úılerine oraldy», — dep habarlady Túrkistan oblysy polısıa departamentiniń baspasóz qyzmeti.