Almatyda balalardaǵy tereń kúıikterdi emdeýge jáne aýyr jaraqattardan keıin qozǵalys qabiletin qalpyna keltirýge arnalǵan halyqaralyq sheberlik sabaǵy ótip jatyr, dep habarlaıdy infohub.kz saıty.
İs-shara Balalar shuǵyl medısınalyq kómek ortalyǵynyń bazasynda uıymdastyryldy. Túrik mamandary teri plasıkasyna arnalǵan zamanaýı qurylǵylardy ala kelip, olardy Almaty ortalyǵyna tabystady.
Bir apta boıy Qazaqstan men Túrkıanyń dárigerleri birlesken operasıalar jasap, pasıentterge keńes berip, kúrdeli klınıkalyq jaǵdaılardy taldaýda.
Balalar shuǵyl medısınalyq kómek ortalyǵynyń kúıik bólimshesiniń meńgerýshisi Radja Jýmadıldaevtiń aıtýynsha, jyl saıyn klınıkaǵa kúıikpen shamamen 2 myń bala júginedi, onyń myńnan astamy aýrýhanaǵa jatqyzýdy qajet etedi.
Ankaradaǵy balalar hırýrgıasy klınıkasy men kúıik ortalyǵynyń jetekshisi Emrah Shenel sheberlik sabaǵy aıasynda kúıikten keıin tyrtyq ózgeristerine baılanysty aıaǵyn qalypty qozǵalta almaǵan balaǵa operasıa jasalǵanyn aıtty. «Biz aıaqtyń qozǵalǵyshtyǵyn qalpyna keltirdik. Qazaqstandyq áriptester mundaı operasıalardy jaqsy meńgergen. Bir jaǵyn jergilikti hırýrgter, al ekinshi jaǵyn biz birlesip jasadyq», — dep atap ótti ol.
Buǵan deıin qazaqstandyq dárigerler gaz balony jarylǵannan keıin denesiniń 89 paıyzy kúıgen jigitti aman alyp qalǵan edi, al odan buryn Almatyda kúıikten aýyr jaraqat alǵan jeti balaǵa plasıkalyq operasıa jasalǵan bolatyn.