Túrkistan oblysynda kontrabanda, bopsalaý, sybaılas jemqorlyq jáne aqshany zańsyz shetelge shyǵarýmen baılanysty birneshe qylmystyq sqemanyń áreketi toqtatyldy, dep habarlaıdy infohub.kz.
Túrkistan oblysynyń ekonomıkalyq tergeý departamenti jalǵan kásiporyndar arqyly shetelge shamamen 200 mıllıard teńge zańsyz shyǵarylǵanyn anyqtady. Osy fakt boıynsha Qylmystyq kodekstiń 235-1-babynyń 3-bóligi ("Valútalyq qundylyqtardy Qazaqstan Respýblıkasynan zańsyz áketý, jiberý jáne aýdarý") boıynsha sotqa deıingi tergeý bastaldy.
Sonymen qatar, prokýratýra Qyrǵyzstannan temeki ónimderiniń kontrabandalyq arnasynyń joly kesilgenin habarlady. Tergeý nusqasy boıynsha, temekiler Túrkistan oblysyna zańsyz ákelinip, sodan keıin óńirde jáne Qazaqstannyń batysynda satylǵan. Jedel is-sharalar barysynda 103 mıllıon teńge somasyndaǵy temeki ónimderi tárkilendi. Tergeý Qylmystyq kodekstiń 214-baby ("Zańsyz kásipkerlik") boıynsha júrgizilýde.
Taǵy bir epızod – shekara mańynda júk kólikteriniń júrgizýshilerinen aqsha bopsalaǵan qylmystyq toptyń anyqtalýy. Prokýratýra málimetinshe, tergeý barysynda zańsyz deldaldyq qyzmetten túsken qarajattyń bir bóligi memlekettik organdardyń laýazymdy tulǵalaryna para retinde berilgeni anyqtaldy. Sotqa deıingi tergeý júrgizilýde. Qylmystyq sqemaǵa qatysy bar 23 adam anyqtaldy. Onyń beseýi qamaýda.
Eske sala keteıik, buǵan deıin Qazaqstanda markalanbaǵan temeki ónimderin zańsyz ákelý jáne satýmen aınalysqan transulttyq toptyń áreketi toqtatylǵan bolatyn. Sqemaǵa qatysýshylar esep aıyrysý úshin beıresmı aqsha aýdarý júıesi "Havalany" paıdalanǵan.