Túrkistan oblysy Qazyǵurt aýdanynyń turǵyndary birneshe eldi mekenge jetken selden keıin baspanasyz jáne malynan aıyryldy. Laıly sý birneshe aýyldy sharpyp, úıler men aýlalardy sý basyp, qoralar qırap, mal ólip, kóptegen másele týyndady, dep habarlaıdy infohub.kz saıty.

KTK telearnasynyń dereginshe, tústen keıin aýdanda burshaq jaýyp, artynsha nóser bastalǵan, sońynan taýdan laıly sý aǵyny kelgen. Birneshe aýyldyń turǵyndary apattyń aýqymyn aıtyp berdi.

«Mine, qorany da aǵyzyp ketti, shópti de aǵyzyp ketti, saban da ketti. Bul sel — bir pále ǵoı. Mine, ne bolyp jatyr. Biz aralda qalǵandaı boldyq», — deıdi jergilikti turǵyndar.

Kýágerlerdiń aıtýynsha, laıly sý kólikterdi aǵyzyp, mal qoralaryn qıratyp, úılerdiń irgetasyn shaıyp ketken. Eń aýyr jaǵdaı Qosaǵash turǵyndaryna túsken. Onda sý bir jarym metrge deıin kóterilip, bútin otbasylar baspanasyz qalǵan.

«Bul úı múldem jaramsyz boldy, mal óldi, qora qırady. Qysqasy, otyratyn jer de joq. Úıde alty adam turamyz, kelinim ekiqabat. Endi kimge baryp turamyz? Eń jaqsy degende úsh kúnge qabyldaıdy, odan keıin ne bolady?» — dedi Temir Qudakeldiuly.

Sý tasqyny kúnine keminde myń nan pisiretin jalǵyz derlik naýbaıhanaǵa jetti. Sý jabdyqty búldirdi.

«Men 25–30 dúkendi nanmen qamtamasyz etetinmin, kúnine myń nan pisiremin. Adamdardy asyraımyn ǵoı. 40 qaptyń altaýy ǵana bútin qaldy. Mine, qamyr, keshe ǵana qoıǵanbyz. Biraq sý kelip, bári búlindi. Qoram da qırady. Mal da aǵyp ketti, eki bas», — deıdi jergilikti kásipker.

Mundaı nóserdi adamdar keminde 30 jyldan beri kórmegenin aıtady. Sebebi buryn aýyl aınalasynda aryqtar bolǵan, al qazir olardyń aıtýynsha, ol jerge úı salynyp, sý buratyn arnalar joǵalǵan. Zardap shekkender bárin burynǵydaı qaıtarýdy talap etedi.

«Bizdiń ústimizde aryq boldy, úlken aryq. Sý sol arqyly ketetin. Qazir ol aryq tolyq kómilgen: adamdar kópir saldy, qora turǵyzdy, aǵash otyrǵyzdy. Endi saıdan kele jatqan sý qaıda ketedi? Men joǵaryda kanal qazyp, sý aýyldyń etegine deıin aǵatyndaı bolsyn dep talap etemin», — dedi Lıza Jarqynbekova.

Úsh aýyldyń turǵyndaryna sý tasqynynyń saldaryn joıýǵa ondaǵan qutqarýshy kómektesti. Táýlikten astam ýaqyt sý soryp, laı tazalady. Qazir sheneýnikter shyǵyndy eseptep, zardap shekkenderdiń sanyn anyqtap jatyr.

«Qazir qalpyna keltirý jumystary júrip jatyr. Biz barlyq úıdi aralap shyǵamyz, men ózim ár úıdi jeke qarap shyǵamyn. Ári qaraı qosymsha jumys kúshin tartamyz. Qazir barlyq aýyldyq okrýgterdi jumyldyrdyq», — dep túsindirdi Qazyǵurt aýdany ákiminiń orynbasary Nursultan Medeýov.

Ol sondaı-aq zardap shekkenderge qajetti kómek kórsetiletinin ýáde etti. Sondaı-aq ákimdikte sý buratyn arnalardy qalpyna keltirý máselesi qarastyrylady.

Buǵan deıin biz Túrkistan oblysy Qazyǵurt aýdanyndaǵy birneshe aýyldyń qatty jańbyrdan sý astynda qalǵanyn jazǵanbyz. Jaǵdaıdy aýdandyq ákimdikte túsindirdi.