Túrkistan oblysynyń prokýratýrasy birden úsh iri qylmystyq sqemany anyqtady. Vedomstvonyń málimetinshe, jalǵan kásiporyndar arqyly shetelge shamamen 200 mlrd teńge shyǵarylǵan. Sonymen qatar, shekarada júk kólik júrgizýshilerinen aqsha bopsalap, laýazymdy tulǵalarǵa para bergen top áreket etken. Qyrǵyzstannan Qazaqstanǵa temeki zańsyz ákelingen — dep habarlaıdy infohub.kz.
Eń iri sqema aqshany zańsyz aýdarýǵa baılanysty. Ekonomıkalyq tergeý departamenti prokýratýranyń úılestirýimen jalǵan kompanıalar arqyly 200 mlrd teńgedeı somanyń jaqyn jáne alys shet elderge aýdarylǵanyn anyqtady. Tergeý Qylmystyq kodekstiń 235-1-baby boıynsha júrgizilýde.
Bir mezgilde quqyq qorǵaý organdary shekara mańyndaǵy qylmystyq toptyń áreketin toqtatty. Bopsalaýshylar júk kólikteriniń júrgizýshilerin tonap, zańsyz deldaldyqtan túsken aqshanyń bir bóligin laýazymdy tulǵalarǵa para retinde bergen. Tergeý sqemaǵa qatysy bar 23 adamdy anyqtady, onyń beseýi qamaýǵa alyndy.
Úshinshi sqema temeki kontrabandasyna qatysty. Temeki Qyrǵyzstannan zańsyz ákelinip, Túrkistan oblysy men Qazaqstannyń batys aımaqtarynda satylǵan. Quqyq qorǵaýshylar 103 mln teńge turatyn temeki ónimderin tárkiledi.
Buǵan deıin Qazaqstandaǵy kontrabanda synı deńgeıge jetkeni habarlanǵan bolatyn. Almaty baraholkasynyń kóleńkeli aınalymy, naryq qatysýshylarynyń baǵalaýynsha, jylyna shamamen úsh mıllıard dollardy quraıdy. Halyqaralyq TRACIT uıymynyń boljamynsha, zańsyz temekiniń úlesi 10%-ǵa jetýi múmkin. Sondaı-aq, tólenbegen aksızder men salyqtar saldarynan búdjet jyl saıyn ondaǵan mıllıard teńge joǵaltady.