Túrkistan oblystyq klınıkalyq aýrýhanasynda bir kúnde eki otbasy sátti transplantasıadan keıin úılerine shyǵaryldy. Bir otbasynda baýyr donory uly bolsa, ekinshisinde ana óz balasyna búıregin berdi, dep habarlaıdy infohub.kz.
Oblystyq densaýlyq saqtaý basqarmasynyń málimetinshe, óńirde aǵza transplantasıasy boıynsha eki operasıa jasaldy. Birinshi otbasynda 20 jastaǵy jigit anasyna baýyrynyń bir bóligin berip, oǵan jańa ómirge jol ashty. Ekinshi otbasynda ana ulyna óz búıreginiń birin berip, onyń ómirin ekinshi ret syılady.
Basqarmanyń dereginshe, eki operasıa da sátti ótti. Kúrdeli baýyr transplantasıasy A.N. Syzǵanov atyndaǵy UǴOH tóraǵasy, profesor Bolatbek Baımahanovtyń jetekshiligimen joǵary bilikti mamandar tobynyń qatysýymen jasaldy.
Qazir naýqastar úılerine shyǵarylyp, ýchaskelik dárigerlerdiń baqylaýynda. DSB mamandary bul tájirıbe otandyq dárigerlerdiń joǵary kásibıligin ǵana emes, sonymen qatar jaqyndarynyń ómirin saqtap qalý jolyndaǵy janqıarlyǵyn kórsetetinin atap ótti.
Buǵan deıin 172 myńnan astam qazaqstandyq eGov arqyly qaıtys bolǵannan keıingi donorlyqqa óz kózqarasyn resmı túrde bildirgeni belgili boldy. Atap aıtqanda, 156,1 myń azamat bas tartqanyn, al 16,1 myń qazaqstandyq kelisimin bergen.
Odan buryn Astanadaǵy UMC ortalyǵynyń dárigerleri 60 jastaǵy naýqasqa júrek transplantasıasyn jasaǵany habarlanǵan bolatyn. Donorlyq aǵza qaıtys bolǵan adamnyń týystary kelisim bergennen keıin birneshe saǵat ishinde jetkizilip, aýystyryldy.