Stambýldyń Joǵarǵy qylmystyq soty Izraıl premer-mınıstri Bınámın Netanáhýdy Interpol arqyly asa qaýipti qylmysker retinde halyqaralyq izdeýge jarıalady. Bul sheshim 2026 jyldyń 14 shildesinde, seısenbi kúni qabyldandy, dep habarlaıdy infohub.kz.
Sot Netanáhýǵa Tel-Avıvtiń Gaza sektoryna gýmanıtarlyq kómek jetkizetin flotılıany toqtatýyna baılanysty halyqaralyq tutqyndaý orderin shyǵarýdy uıǵardy. Bul — Gazaǵa kómek jetkizýge tyrysqan Global Sumud Flotilla gýmanıtarlyq flotılıasy.
Sáýir aıynda Stambýl prokýratýrasy Netanáhýdy qosa alǵanda, 35 adamǵa qatysty flotılıa kemelerin qarýly basyp alý isi boıynsha aıyptaý qorytyndysyn jarıalady. Netanáhýdan bólek, aıyptalýshylar qatarynda Izraıl qorǵanys mınıstri Israel Kas, onyń aldyndaǵy áriptesi Ioav Galant, ulttyq qaýipsizdik mınıstri Itamar Ben-Gvır, Bas shtab bastyǵy Eıal Zamır jáne basqalar bar.
Olarǵa «adamzatqa qarsy qylmystar», «genosıd», «bas bostandyǵynan aıyrý», «densaýlyqqa qasaqana zıan keltirý», «azaptaý», «tonaý», «múlikti joıý nemese búldirý» jáne «kólik quralyn basyp alý» aıyptary taǵyldy. Prokýratýra barlyq aıyptalýshylarǵa ómir boıy bas bostandyǵynan aıyrý jazasyn taǵaıyndaýdy talap etti.
Mamyrda Túrkıa prezıdenti Rejep Taıyp Erdoǵan Netanáhýǵa jaqyn arada búkil musylman áleminen «sabaq alatynyn» eskertti.
Izraıl tarapy aıyptaýlardy joqqa shyǵarady. Tel-Avıvtiń pikirinshe, Global Sumud flotılıasyn Túrkıa Gaza sektorynyń teńiz blokadasyn buzýdyń taǵy bir áreketi retinde daıyndaǵan.