Túrkıa Syrtqy ister mınıstrligi Aqtaý jaǵalaýyndaǵy Áskerı-teńiz kúshteriniń oqý-jattyǵýy kezinde qazaqstandyq áskerılerdiń qaza tabýyna baılanysty resmı kóńil aıtty, dep habarlaıdy infohub.kz saıty.
Túrkıanyń syrtqy saıası vedomstvosy jazbasha málimdeme jarıalap, onda qaıǵyly oqıǵaǵa baılanysty tereń qaıǵysyn bildirdi. «Aqtaý jaǵalaýynda Qazaqstan Áskerı-teńiz kúshteriniń oqý-jattyǵýy kezinde adamdardyń qaza tabýy bizdi qatty qaıǵyrtty. Qaza tapqandardyń jaqyndaryna jáne Qazaqstan halqyna kóńil aıtamyz», — delingen málimdemede.
Buǵan deıin Qazaqstanǵa kóńil aıtýdy Ázirbaıjan Syrtqy ister mınıstrligi joldaǵan bolatyn. Ol Kaspı teńizindegi áskerılerdiń qaza tabýyna qatysty pikir bildirdi.
24 qyrkúıekte Reseı prezıdenti Vladımır Pýtın memleket basshysy Qasym-Jomart Toqaevqa jedelhat joldap, Mańǵystaýdaǵy qaıǵyly oqıǵaǵa baılanysty kóńil aıtty. Qazaqstan prezıdenti óz kezeginde Reseı kóshbasshysyna bildirgen janashyrlyǵy úshin alǵys aıtty.
Qaıǵyly oqıǵa 24 qyrkúıekte Mańǵystaý oblysynda Qazaqstan Respýblıkasy Qarýly kúshteriniń Áskerı-teńiz kúshteriniń Kaspı teńizi jaǵalaýyndaǵy oqý-jattyǵýy kezinde boldy. Aýa raıynyń kúrt nasharlaýy men jeldiń kúsheıýi saldarynan áskerıler teńizge aǵyzylyp ketti. Jedel qabyldanǵan sharalardyń arqasynda úsh áskerı qutqaryldy, taǵy ekeýin izdeý jalǵasýda. Ókinishke qaraı, 12 áskerı qaza tapty.
Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady. Qorǵanys mınıstrligi oqý-jattyǵý kezinde qaza tapqandardyń tizimin jarıalady — oǵan 11 matros jáne bir aǵa leıtenant kirdi. İshki ister mınıstrligi basshysynyń orynbasary áskerılerdiń qaza tabýyna qatysty qylmystyq is qozǵalǵanyn habarlady.
Qazirgi tańda Kaspıde izdestirý operasıasy jalǵasýda.