Tanymal qazaqstandyq kásipker, prodúser ári aktrısa Baıan Alaǵuzovanyń jubaıy Tursyn Alaǵuzov 57 jasqa tolýyn keń kólemde atap ótti. Toıǵa otandyq shoý-bıznes juldyzdary shaqyryldy, dep habarlaıdy infohub.kz saıty.
Baıan Maqsatqyzy Instagram paraqshasynda súıikti jubaıynyń týǵan kúnine arnalǵan keshtiń kadrlaryn jarıalady. Qonaqtarǵa kóptegen kóńildi konkýrstar men tańdaýly dámdi taǵamdar daıyndaldy.
Shaqyrylǵandar arasynda jubaıymen birge Dınara Satjan, Aıda Kaýmenova, Erke Esmahan men RaiM, Aıqyn men Juldyz Ómirǵalı, sondaı-aq qazaqstandyq shoý-bıznestiń basqa da ókilderi baıqaldy.
Qonaqtardyń aldynda A'Studio toby men Nurlan Sabyrov óner kórsetti. Týǵan kún ıesine qymbat ári este qalarlyq syılyqtar tartý etildi. Atap aıtqanda, Baıan Maqsatqyzy jubaıyna altyn túıreýish syılady, al onyń úlken qyzy men kúıeý balasy tosynsyı jasap, 1981 jylǵy Cadillac tartý etti.
Dınara Satjan da toıdan kadrlar bólisti. «Baqytty bolý — bári jaqsy bolatyn sátti kútý emes. Baqyt — «bir kúni» degen týraly emes. Ol — dál qazir, osy sátte! Ózińmen dál qazir bolyp jatqan sátte bola bilý. Esteliktermen ómir súrmeý jáne ómirdi odan da jaqsy bolady dep keıinge qaldyrmaý. Osynda jáne qazir ómir súrý. Óıtkeni qazir — bizde shynymen bar jalǵyz nárse! Týǵan kúnińmen, Tursyn Alaǵuzov!» — dep jazdy telejúrgizýshi.