Ýgandanyń shyǵysynda bolǵan mektep avtobýsy apatynan qaza tapqandar sany 24-ke jetti. Polısıanyń málimetinshe, taǵy úsh oqýshy jaraqatynan kóz jumdy. Bul apattan 23 bala men bir eresek adam qaza tapty, dep habarlaıdy infohub.kz saıty.
Kampýladaǵy Kıng Devıd bastaýysh mektebiniń avtobýsy beısenbi kúni keshke Sıpı sarqyramasyna sapardan qaıtyp kele jatyp, apatqa ushyraǵan. Avtobýsta ondaǵan oqýshy men muǵalim bolǵan. Polısıa tergeýshileriniń aıtýynsha, júrgizýshi Kapchorva aýdanyndaǵy Chekvatıt aýylynda avtobýs basqarýdan shyǵyp, aýdarylyp, úlken tasqa soǵylǵan.
Qaıtys bolǵandardyń altaýynyń kim ekeni anyqtalmaǵan. Qaza tapqan eresek adam mekteptiń negizin qalaýshy jáne dırektory bolýy múmkin dep boljanýda. Ondaǵan bala aýrýhanaǵa jetkizilgen, olardyń 23-i áli kúnge deıin Kapchorva jalpy aýrýhanasynda em alyp jatyr. Sol saparǵa shyqqan taǵy úsh kólik úıine qaýipsiz oralǵan.
Ýgandanyń Bilim jáne sport mınıstrligi juma kúni mektep saparlaryna jalpyulttyq tyıym salyp, «oqýshylardyń qatysýymen bolǵan sońǵy apattardyń mán-jaıyn jan-jaqty tergeýdi» tapsyrdy. Polısıa da oqýshylardyń mektepterine qaýipsiz oralýyn qamtamasyz etý úshin eskort usynatynyn málimdedi.
Ýganda álemdegi jol qaýipsizdigi eń nashar elderdiń biri. Apattar kóbinese kólikter men joldardyń durys kútilmeýinen, sondaı-aq jyldamdyqty asyrýdan bolady. Osy aıdyń basynda soltústik Ýgandada avtobýs pen júk kóligi soqtyǵysyp, 14 adam qaza tapty. Qazan aıynda magıstralda eki avtobýs soqtyǵysyp, kem degende 46 adam qaza tapty.