Ýgandada álemniń eń jas monarhy atanǵan Tooro patshalyǵynyń bıleýshisi Oıo Nımba Kabamba Igýrý Rýkıdı IV jer qoınyna tapsyryldy. Ol 34 jasynda AQSH-ta qaterli isikke emdelip júrip qaıtys bolǵan. Murager máselesine qatysty daý shyqqan soń, jerleý rásimi birneshe kúnge keıinge shegerilgen edi, dep habarlaıdy infohub.kz saıty.
Oıo úsh jasynan bastap Ýgandanyń batysyndaǵy dástúrli Tooro patshalyǵyn basqarǵan. Tooro — Ýgandanyń dástúrli patshalyqtarynyń biri. Olar 1967 jyly joıylyp, 1990 jyldary Prezıdent Mýsevenı tusynda qaıta jańǵyrtyldy. Olardyń bıleýshileri saıası basshy emes, mádenı kóshbasshy retinde tanylady.
Patshanyń tabyty Fort-Portaldaǵy patshalyq qabirlerge jetkizilgende, myńdaǵan aza tutýshy kóshe boıynda tizilip turdy. Jeke rásim sol jerde ótti.
Oıo Tooronyń patshasy bolyp taǵaıyndalǵanda náreste ǵana edi. Gınness rekordtar kitabynyń dereginshe, ol bılik qurǵan kezde álemdegi eń jas monarh bolǵan.
Rý basylary kelesi monarh etip taǵaıyndaǵan 56 jastaǵy telejúrgizýshi hanzada Edvard Rýkıdı Kıdjanangoma Oıonyń qabirine toǵyz kofe dánin tastady. Bul rásim bir bıliktiń aıaqtalyp, ekinshisiniń bastalǵanyn bildiredi.
Alaıda birneshe kún buryn Oıonyń otbasy marqum monarhtyń nemere aǵasy Kıdjanangomany Tooronyń jańa patshasy retinde moıyndamady. Oıonyń qaryndasy, hanshaıym Rýt Komýntale marqum patshanyń 2022 jyly jazylǵan ósıet qaldyrǵanyn, onda kishkentaı uly murager etip kórsetilgenin aıtty. Balanyń esimi eshqashan jarıalanbaǵan.
Sonymen qatar onyń anasy, hanshaıym Best Kemıgısa saraıdan patshalyq kúzetshiler alynyp, áskerıler ornalastyrylǵanyn málimdedi. Onyń aıtýynsha, bul patsha áýletiniń qozǵalysyn jáne qonaq qabyldaý múmkindigin shektep, «úı qamaýynda» ustaýǵa aınalǵan.
Senbide Ýganda shirkeýiniń arhıepıskopy Stıven Kazımba Mýgalý birlikke shaqyrdy. «Qaıǵy kezinde aıtylǵan sózder jaraqat ákelip, bólinis pen janjal týdyrýy múmkin. Ol tipti biz aza tutyp otyrǵan patshanyń murasyn joıa alady», — dedi ol aza tutýshylarǵa.
Ýganda Prezıdenti Ioverı Mýsevenı de máseleniń «bólinisten góri birlikti qoldaıtyndaı» sheshilýin talap etti.
Muragerlik máselesin qadaǵalap otyrǵan rý Kıdjanangomany tańdaýyn qorǵady. Babııto patshalyq rýynyń basshysy Omýsýýga Charlz Karýması: «Biz Tooronyń mádenıeti men dástúrlerin saqtaı otyryp, bárin jasadyq. Barlyǵymyz beıbitshilik pen tynyshtyqty saqtaýymyz kerek», — dedi.