Ýkraına Kaspı qubyr konsorsıýmynyń (KTK) nysandaryna jáne onyń Qara teńizdegi termınalyna bara jatqan tankerlerge, eger olar Reseıge qatysy bolmasa, Ýkraına sanksıalarynyń tiziminde bolmasa jáne reseılik munaı tasymaldamasa, shabýyl jasamaýǵa mindettendi, dep habarlaıdy infohub.kz.
Bloomberg-tiń amerıkandyq sheneýnikke silteme jasaýynsha, Kıev bul kepildikti AQSh bıliginiń ókilderimen kelissózderden keıin berdi.
Óz kezeginde The Wall Street Journal AQSh prezıdenti Donald Tramp ákimshiligi Ýkraınany Qara teńizde úshinshi elderdiń kemeleri men munaı ınfraqurylymyna shabýyl jasaýǵa jol berilmeıtini týraly eskertkenin habarlaıdy.
Mundaı áreketterdiń yqtımal zıany máselesi Aq úıde KTK-niń 15% úlesine ıe jáne konsorsıým ınfraqurylymyn qorǵaýǵa múddeli amerıkandyq Chevron kompanıasynyń ókilderi tarapynan kóterildi.
Aıta ketý kerek, KTK sońǵy ýaqytta birneshe ret shabýylǵa ushyrady. 2025 jyldyń aqpanynda jeti ushqyshsyz ushý apparaty eń iri munaı aıdaý stansıasy «Kropotkınskaıaǵa» soqqy berdi, sodan keıin júıe boıynsha munaı aıdaý 30–40%-ǵa qysqardy.
Kúzde teńiz termınalynyń bir aılaq qurylǵysy zaqymdandy. Shabýyldardyń jańa tolqyny 2026 jyldyń shildesinde boldy: qazaqstandyq munaı tasymaldaǵan Nordic Zenith, ASIA, NISSOS IOS jáne NELSA tankerleri zaqymdandy. Osyǵan baılanysty KTK munaı qabyldaýdy jáne tıeýdi ýaqytsha toqtatýǵa májbúr boldy.
Buǵan deıin Qazaqstan Energetıka mınıstrligi KTK munaı qubyryn ýaqytsha toqtatqannan keıin qaıtadan munaı qabyldaı bastaǵanyn habarlaǵan bolatyn.
Keshe Ulttyq bank tóraǵasy Tımýr Súleımenov retteýshi KTK arqyly munaı eksportynyń ýaqytsha toqtatylýyna baılanysty teńge baǵamynyń kúrt aýytqýyn kútpeıtinin málimdedi. Sonymen qatar, Ulttyq bank baǵamnyń naryqtyq emes aýytqýlary baıqalsa, shara qoldanýǵa daıyn.
Energetıka jáne ınvestısıa salasyndaǵy sarapshy Oljas Baıdildınovtyń esepteýinshe, KTK-ǵa jasalǵan shabýyldar saldarynan Qazaqstan shilde aıynda 700 mln dollardan astam qarajat ala almaı qalýy múmkin.