Kıevte Reseı men AQSH-pen qaqtyǵysty retteý úshin kelissózder júrgizýge daıyn ekenin rastady, dep habarlaıdy infohub.kz.
Ýkraına prezıdenti Vladımır Zelenskıdiń keńsesi basshysynyń orynbasary Sergeı Kıslısa «Ýkrınform» agenttigine bergen suhbatynda ýkraın tarapynyń dıalogqa ashyq ekenin aıtty. «Biz ashyq aıttyq jáne aıtyp kelemiz: biz kelissózder ústeline otyrýǵa daıynbyz, amerıkandyq tarapty tyńdaýǵa, reseıliktermen sóılesýge jáne bul soǵystyń nege toqtaýy kerek ekendigine dálelderimizdi jetkizýge daıynbyz», — dep atap ótti ol.
Kıslısa dıplomatıa «kez kelgen jaǵdaıda» jumys isteýi kerek ekenin, al dıplomatıalyq jumysty toqtatý «qate jáne qaýipti bolar edi» dep málimdedi. Ol sondaı-aq AQSh prezıdentiniń arnaıy ókili Stıven Ýıtkoff pen Aq úı basshysynyń keńesshisi, Donald Tramptyń kúıeý balasy Djared Kýshnerdiń Kıevke yqtımal sapary týraly máseleni ózekti dep atady. Onyń aıtýynsha, olar kelýge ýáde bergen, biraq sapar keıinge shegerilgen. «Aldymen 1 sáýirge ýáde berdi, keıin Stıv Ýıtkoff 28 shildede Aq úıdegi kezdesýde bolǵanda, taǵy ýáde berdi. Kóremiz... Biz dál amerıkandyq tarap osy kelissóz prosesiniń qarqyndylyǵyna naqty áser ete alady dep esepteımiz, sondyqtan olarǵa senemiz», — dedi Kıslısa.
Ol ýkraın tarapy Ýıtkoff pen Kýshnermen únemi baılanysta ekenin, alaıda «ashyq nemese jabyq baılanysta talqylaýǵa bolmaıtyn máseleler» bar ekenin atap ótti. Osyǵan baılanysty «bir-biriniń kózine qarap otyryp, sóılesý kerek», — dep qosty ol.
Sonymen qatar, Reseı prezıdentiniń baspasóz hatshysy Dmıtrı Peskov Ýkraınadaǵy qaqtyǵysty beıbit jolmen retteý múmkindigi qazirgi kezeńde joqqa shyǵarylatynyn málimdedi. «Qazirgi ýaqytta Kıevtiń ustanymyna baılanysty beıbit retteý turǵysynan optımızmge eshqandaı negiz joq, maıdandaǵy jaǵdaı belgili», — dedi ol jýrnalısermen kezdesýde.