2026 jyldyń basynan beri ótkizý pýnktterinde shekaralyq baqylaý kezinde jalǵan qujattarmen kirýge 200 árekettiń joly kesildi, dep habarlaıdy infohub.kz saıty.
Ulttyq qaýipsizdik komıteti shekara qyzmetiniń jalǵan nemese basqa adamdardyń qujattarymen elge kirýge jol bermeý jumysyn qalaı júrgizetinin aıtyp berdi. «Quqyq buzýshylardyń kópshiligi jalǵan vızalar men úshinshi tulǵalardyń derekteri jazylǵan qujat blankilerin paıdalanǵan. Olardy qoldaný jıiligi shekaranyń ońtústik ýchaskeleri men halyqaralyq áýe joldarynda anyqtaldy», — dep atap ótti UQK.
2025 jyly osyndaı 660-tan astam quqyq buzýshylyq anyqtalǵan. Shekarashylar jalǵan jáne basqa adamdardyń qujattaryn paıdalanyp shekaradan ótý qylmystyq jaýapkershilikke ákep soǵatynyn eske saldy.