Hege oılaısyń, qulynshaǵym?
He muńyń bar, aıt, qaraǵym!
Jassyń, oıǵa áýes bolma,
Oı jetkizbes, ol - bir saǵym!
Ulǵaıarsyń, ózi-aq basar,
Jastyq - kúlip-oınar shaǵyń.
İsh pyssa - maldy arala,
Júr ǵoı shaýyp qulynshaǵyń!
- Joq, barmaımyn, apa, malǵa,
Ketem alys, shyǵam ańǵa!
- Sheriń bolsa, dombyrańdy al,
Dombyrańdy al, án shyrqap sal.
Daýsyńdy estip, jas sulýlar
Talyp jutsyn tátti ýly bal.
Betterińnen qan tamyp tur,
Tal qyzyǵady boıyńa tal.
Hege oılysyń, erke marqam,
Bir qarakóz bolmaı ma jar?
- Qaramaımyn, apa, jarǵa,
Ketem alys, shyǵam ańǵa!
- Seni tapqan men anań ǵoı,
Qarashyǵym, sen balam ǵoı!
Alys jolǵa ketseń, qozym,
Kútip, kúıip, men janam ǵoı.
Qart kúnimde sensiz, sáýlem,
Saǵynyp seni, sarǵaıam ǵoı.
Meni deseń, erketaıym,
Ketpe alysqa, qoı, balam, qoı
- Renjime, apa, kútpe, janba,
Ketem alys, shyǵam ańǵa.
Ketti alysqa - shyǵyp ańǵa!..
Jolaýshylyq jelge tań ba?
Malyń, jaryń, týysqanyń
Baılaý bolmas júırik janǵa!
Ketip bara jatqanynda,
Jaý kez keldi jalǵyz janǵa.
Naızalasty, qylyshtasty,-
Ulan óldi batyp qanǵa,
Ulan óldi batyp qanǵa,
Tynyshtyq tapty asaý jan da.

---