Qosylyp, birneshe adam ortaqtasyp,
Úı salyp, ortasynan dúken ashyp,
Saýdasy juǵymdy bop, baıyp ábden,
Shat bolyp, kóńilderi sýdaı tasyp,
Aqshany tóbedeı ǵyp úıip qoıyp,
Úlesip otyr edi shýyldasyp.
«Úı janyp barady!» - dep habar berdi
Júgirip kelip bireý túsi qashyp.
«Júrińder, - bireýi aıtty, - baraıyq, - dep,
Esepke qaıtyp kelip salaıyq», - dep.
Aıtady ekinshisi: «Myń somym kem,
Toqtańdar, sony áýel sanaıyq», - dep.
«Kem, - dedi, - eki myńym, - jáne biri, -
Qarańdar, ap-anyq tur kemi, mine!»
«Qoı, - desti ózgeleri, - bul ótirik,
Bolmasa kerek qate ondaı iri».
Taýysa alman sózderiniń bárin terip,
Áıteýir zor janjaldyń kirdi túri.
Birtalaı eregispen mezgil ótti,
Umytty, janjaldasyp, bári de órtti.
Eseptiń bitýine ot qarar ma?
O daǵy tútindetip kelip jetti.
Shyǵarǵa jol joq, jalyn qamap alǵan -
Bári de mal-múlkimen kúıip ketti.
Oılasaq, ýaqıǵa emes bolmaıtuǵyn,
El qaıda ózin daýdan qorǵaıtuǵyn?
Qazirgi paıdasyna bári jetik,
Adam az aldyn qarap boljaıtuǵyn.
Ańdysqan birin biri jaýdan jaman,
Baıqasam, el belgisi - ońbaıtuǵyn.
Bul belgi tabylyp tur bizdiń jurttan,
Talasyp, bir-biriniń júzin jyrtqan.
Aldanyp aradaǵy daý-sharyna,
Qaterden qaperi joq keler syrttan.

---