Qazaqstan Ulttyq banki azamattarǵa úndeý jasap, alaıaqtar sálemdeme, SMS-kodtar men eGov atynan qońyraý shalý arqyly aqshaǵa qol jetkizetin telefon alaıaqtyǵy sqemasy týraly eskertti, dep habarlaıdy infohub.kz saıty.
Sqema kýrerlik nemese poshta qyzmetiniń atynan qońyraý shalýdan bastalady: adamǵa sálemdeme kelgeni aıtylyp, jetkizýdi rastaý úshin SMS-tegi kodty ataýdy suraıdy. Alaıaqtar kýrer kútip turǵanyn, kezekten aıyrylyp qalý qaýpin nemese áńgime bitken soń jetkizýdi qaıta rásimdeý qajettigin syltaýratyp, áńgimelesýshini ádeıi asyqtyrady. Osylaısha olar jedeldik sezimin týdyryp, adamǵa SMS-habarlamanyń mazmunymen muqıat tanysýǵa múmkindik bermeıdi.
Kodty alǵan soń alaıaqtar kelesi kezeńge kóshedi. Azamatqa ózin sıfrlyq úkimettiń (eGov) qyzmetkeri retinde tanystyrǵan adam qońyraý shalady. Áńgime barysynda eseptik jazba buzylǵany, sondaı-aq derbes derekterdiń tarap ketýi nemese kóshirilýi múmkindigi týraly aıtylady. Senimdirek bolý úshin alaıaqtar azamatty qorǵaý maqsatynda «Stop-kredıt» qyzmeti qosylǵanyn, al jaǵdaı quqyq qorǵaý organdarynyń nemese «Ulttyq banktiń qaýipsizdik qyzmetiniń» baqylaýynda ekenin alǵa tartýy múmkin. Keıin qońyraý sqemanyń basqa qatysýshysyna qosylýy yqtımal. Mundaı áreketterdiń túpki maqsaty — azamattardyń aqshasyna qol jetkizý.
Mundaı sqemalardyń tán belgisi — psıhologıalyq qysym. Alaıaqtar telefon áńgimesin úzbeýdi, bolyp jatqan jaǵdaıdy úshinshi tulǵalarǵa aıtpaýdy jáne áńgimeniń qupıalylyǵyn saqtaýdy talap etýi múmkin. Keıbir jaǵdaıda azamattardy aqparatty jarıa etkeni úshin qylmystyq jaýapkershilikpen qorqytyp, ne áńgimeni toqtatý aqsha men derbes derekterdi qorǵaýǵa baǵyttalǵan rásimderdiń kúshin joıatynyn alǵa tartady. Mundaı áreketter azamattyń jaqyndarynan, bankten ne quqyq qorǵaý organdarynan keńes pen kómek suraý múmkindigin shekteýge baǵyttalǵan.
Ulttyq bank SMS-habarlamany jiberýshini muqıat oqyp, tekserýdi, SMS-tegi kodtardy eshqashan úshinshi tulǵalarǵa aıtpaýdy, al kúdikti qońyraý túsken jaǵdaıda áńgimeni dereý toqtatyp, uıymnyń resmı telefon nómirine qaıta qońyraý shalýdy usynady.
«Ulttyq bank qyzmetkerleri aýdıo- jáne beıneqońyraý shalmaıtynyn, jeke tulǵalardyń shottaryna qyzmet kórsetpeıtinin, aqshany paılyq ınvestısıalyq qorlarǵa jáne ózge de qarjy ónimderine salýdy usynbaıtynyn, aqshany saqtandyrýmen aınalyspaıtynyn, bank kartalarynyń qupıasózderi men derektemelerin suramaıtynyn, sondaı-aq halyqpen aqshalaı esep aıyryspaıtynyn eske salamyz», — dedi Ulttyq bankte.
Alaıaqtyqqa tap bolǵan jaǵdaıda qazaqstandyqtarǵa quqyq qorǵaý organdaryna aryzben júginýge keńes beriledi. Keńesti Ulttyq banktiń 1477 nómiri boıynsha baılanys ortalyǵynan alýǵa bolady.