Qazaqstan Ulttyq Banki azamattardy «tokenızasıalanǵan altynǵa» ınvestısıa salý arqyly joǵary tabys ýáde etetin jańa alaıaqtyq sqemasy týraly eskertti, dep habarlaıdy infohub.kz.

Nasbanktiń baspasóz qyzmetiniń málimetinshe, áleýmettik jelilerde, messendjerlerde jáne forýmdarda alaıaqtar ınvestısıalyq kompanıalar atynan «tokenızasıalanǵan altyn», «óte joǵary tabysty jasandy ıntellekt ázirlemeleri» jáne «neırojeli negizindegi robot-treıder» sekildi usynystardy taratady.

«Alaıaqtar ózderin qarjy keńesshileri retinde tanystyryp, „ınvestısıalyq platformanyń“ nemese „krıptoservıstiń“ joǵary tabystylyǵy týraly jalǵan statısıkany kórsetip, brokerlik nemese krıptovalúta platformasyna uqsaıtyn saıtqa tirkelýge kómektesedi. Mundaı saıttarda naqty ınvestısıalyq qyzmettiń kórinisi jasalady: grafıkter, mámileler tarıhy, jeke kabınet jáne qoldaý chaty kórsetiledi», — dedi Nasbankte.

Senimge kirý úshin alaıaqtar paıdalanýshyǵa az ǵana «paıdany» alýǵa múmkindik beredi. Odan keıin «biregeı usynys», «kiristiń ósýi» nemese «erekshe tıimdi mámile» syltaýymen úlken soma salýǵa kóndiredi. Paıdalanýshynyń shotyndaǵy qarajat aıtarlyqtaı ósken kezde, aqshany shyǵarý múmkin bolmaıdy. Sonymen qatar alaıaqtar salyq, komısıa nemese saqtandyrý tóleýdi talap etedi.

«Zańdylyq kórinisin berý úshin alaıaqtar paıdalanýshylarǵa mór, qol, serıalyq nómirler jáne basqa da derektemeleri bar jalǵan hattar men qujattardy jiberedi. „Salyqtar, komısıalar“ nemese basqa da alymdardy tóleý syltaýymen aqshany alǵannan keıin alaıaqtar baılanysty toqtatady, al platformaǵa kirý buǵattalady», — dep atap ótti Nasbankte.

Nasbank óz qyzmetkerleriniń aýdıo- jáne beıneqońyraýlar jasamaıtynyn, jeke tulǵalardyń shottaryna qyzmet kórsetpeıtinin, ınvestısıalyq qorlarǵa nemese basqa qarjy ónimderine ınvestısıa salýdy usynbaıtynyn, saqtandyrýmen aınalyspaıtynyn jáne halyqpen aqshalaı esep aıyrysýlardy júrgizbeıtinin eske saldy.

«Eger siz alaıaqtyq áreketterge tap bolsańyz, Qazaqstan Respýblıkasynyń quqyq qorǵaý organdaryna tıisti ótinishpen júginýdi usynamyz. Keńes alý úshin Ulttyq Banktiń 1477 qysqa nómirine habarlasýǵa bolady», — dedi baspasóz qyzmeti.