2026 jyldyń segiz aıynda zeınetaqy aktıvterin basqaratyn jeke kompanıalardyń barlyǵy jınaqtalǵan ınflásıadan (6,37%) joǵary tabys kórsetti. Naqty mánde zeınetaqy jınaqtaryn qunsyzdandyrǵan jalǵyz basqarýshy — Ulttyq bank, dep habarlaıdy infohub.kz.
Qazaqstandyqtardyń zeınetaqy aktıvteri Biryńǵaı jınaqtaýshy zeınetaqy qorynda (BJZQ) saqtalyp qana qoımaı, ınflásıadan qunsyzdanýdan qorǵaý úshin túrli qarjy quraldaryna ınvestısıalanady.
1 qyrkúıektegi jaǵdaı boıynsha Ulttyq banktiń basqarýynda zeınetaqy aktıvteriniń 94,66%-y, ıaǵnı 26,95 trln teńge boldy. Jyl basynan beri BJZQ salymshylarynyń shottaryna negizgi basqarýshydan 1,10 trln teńge ınvestısıalyq tabys esepteldi. Tabystylyq 4,2%-dy qurady. Segiz aıdaǵy 6,37% ınflásıany eskersek, naqty mánde zeınetaqy jınaqtary 2,17%-ǵa qunsyzdandy.
BJZQ-nyń ózinde aǵymdaǵy jyldyń basynan beri ınvestısıalyq tabystyń tómendeýine teńgeniń nyǵaıýy saldarynan valútalyq aktıvterdiń teris baǵamdyq qaıta baǵalanýy sebep bolǵanyn túsindirdi.
Tabystylyq boıynsha kósh bastaǵan — portfeli 22,6 mlrd teńge bolatyn «Sentras Sekúrıtız» kompanıasy. Onyń basqarýyndaǵy zeınetaqy aktıvteriniń tabystylyǵy segiz aıda 12,18%, naqty mánde 6,43% boldy. Salymshylardyń shottaryna 1,2 mlrd teńge esepteldi.
Odan keıin jeke basqarýshylar arasynda eń úlken portfeli — 77,6 mlrd teńge — Halyk Finance tur. Kompanıa 9,06% tabystylyq kórsetti, ınflásıany eskergende 2,69%. Salymshylardyń shottaryna 5,8 mlrd teńge tústi.
Jalpy zeınetaqy aktıvterin basqarýshylardyń tabystylyǵy bylaısha qalyptasty: «Sentras Sekúrıtız» — 12,18% (ınflásıany eskergende 6,43%); Halyk Finance — 9,06% (naqty mánde +2,69%); Alatau City Invest — 8,25% (1,88%), portfeli 24 mlrd teńge; BCC Invest — 8,09% (1,72%), portfeli 19,6 mlrd teńge; Halyk Global Markets — 7,55% (1,18%), basqarýynda 6,6 mlrd teńge; Tansar Capital — sáýirden beri 2,43%, portfeli — 743,66 mln teńge.
Aıta keteıik, sońǵy 3,5 jylda zeınetaqy aktıvterin basqarýshylar arasynda tabystylyq boıynsha kósh bastaǵan «Sentras Sekúrıtız» — 64,07% tabystylyqpen ınflásıadan 21,7 p.p. ozdy. Ulttyq bank 45,51% tabystylyq kórsetip, ınflásıadan nebári 3,11 p.p. asty.