Amerıkanyń Ulttyq beısbol lıgasy (MLB) Vaıomıng shtatyndaǵy Grand-Tıton ulttyq saıabaǵynda bir kúndik oıyn ótkizýdi usyndy. Bul bastama jergilikti turǵyndar men tabıǵat qorǵaýshylardyń qarsylyǵyna tap boldy, dep habarlaıdy infohub.kz saıty.
26 qyrkúıekte Washington Post basylymy lıga Aq úıge habarlasyp, Grand-Tıton ulttyq saıabaǵynda bir kúndik oıyn uıymdastyrý múmkindigin talqylaǵanyn jazdy. Tıton okrýgi ózin «jyl boıy jumys isteıtin kýrorttyq qaýymdastyq» dep sıpattaıdy jáne Djekson-Hoýl ańǵarynda ornalasqan. Munda sur aıýlar, balyqshy qyrandar, bızondar jáne basqa da janýarlar mekendeıdi.
Lıganyń federaldy úkimetke jolyǵýy týraly habar tarala salysymen, 310 000 akr (125 500 gektar) aýmaqty alyp jatqan saıabaqta oıyn alańy men kórermenderge arnalǵan ınfraqurylym salýdyń tabıǵı landshaft pen janýarlar álemine tıgizetin áseri jóninde alańdaýshylyq týyndady.
Beısbol oıynynyń múmkindigi týraly daý Amerıkanyń ulttyq saıabaqtary qarjylandyrýdyń qysqarýy, qyzmetkerler tapshylyǵy jáne úzdiksiz halyq kóptiginen qınalyp jatqan kezde bastaldy.
Tıton okrýginiń komısary Lúter Propst saıabaqta beısbol oıynyn ótkizý ıdeıasyn «túsiniksiz jáne múldem qabyldanbaıtyn usynys» dep atap, ony toqtatý úshin jumys isteıtinin málimdedi.
«Barlyǵymyz beısboldy jaqsy kóremiz, biraq [Grand-Tıton ulttyq saıabaǵy] da, ózge de ulttyq saıabaq ta laıyqty oryn emes. Bul — ulttyq másele jáne saıabaqtarymyzdyń qorǵaýǵa, tabıǵat sulýlyǵyn tamashalaýǵa jáne janýarlar mekeni retinde saqtalýǵa arnalǵan tarıhy men mısıasyna múldem qaıshy», — delingen onyń jazbasynda.
Ulttyq jabaıy tabıǵat federasıasy da Facebook-tegi jazbasynda osy alańdaýshylyqty qostady.
«Bizdiń ulttyq saıabaqtar jabaıy tabıǵatty qorǵaý, tańǵajaıyp landshafttardy saqtaý jáne otbasylarǵa tabıǵatpen baılanysýǵa múmkindik berý úshin bar — korporatıvtik sporttyq is-sharalardy ótkizý úshin emes. Saıabaqtarymyzdy jabaıy kúıinde saqtaıyq», — dep jazdy komersıalyq emes uıym dúısenbide.
Guardian basylymyna bergen málimdemesinde Aq úıdiń ókili lıga oıyn ótkizý múmkindigi týraly ózderine habarlasqanyn, alaıda Ulttyq saıabaq qyzmeti eshqandaı ruqsat bermegenin jáne bul oıyn Aq úıdiń tapsyrmasy emes ekenin aıtty.
Lıga da, Ulttyq saıabaq qyzmeti de Guardian-nyń pikir suraǵan ótinishine birden jaýap bermedi.