Қазақстан Ұлттық ұланының бөлімшелері жыл басынан бері 13 мыңнан астам құқық бұзушыны ұстап, ішкі істер органдарына жеткізді. Олардың 300-і ауыр қылмыс жасады деп күдікке ілінген. Бұл туралы Қазақстан Республикасы Ішкі істер министрлігінің Ұлттық ұлан бас қолбасшылығында өткен Әскери кеңестің қорытындысында белгілі болды. Жиынға ішкі істер министрі Ержан Саденов пен Ұлттық ұлан әскерлерінің бас қолбасшысы Ансаған Балтабеков қатысты, деп хабарлайды infohub.kz сайты.
Ведомство басшылары жыл басынан бері атқарылған жұмысты қорытындылап, ұландықтардың азаматтардың тыныштығын қалай қорғағанын баяндады. Атап айтқанда, Ұлттық ұлан патрульдері көшелерді күзетуге 2,3 мыңнан астам рет шықты. Құқық бұзушыларды ұстаумен қатар, әскери қызметшілер бес халықаралық саяси іс-шара мен шет мемлекеттер басшыларының және ресми делегациялардың он сегіз сапарының қауіпсіздігін қамтамасыз етті, деп атап өтті Ұлттық ұланның баспасөз қызметі.
Сонымен қатар, «үшем» деп аталатын патрульдік нарядтар түрмеге тыйым салынған заттарды лақтырудың 64 әрекетін тоқтатты. Сондай-ақ ел бойынша 55 мыңнан астам қамаудағы және сотталған адам тасымалданды.
Ведомство есебінде Алматы, Түркістан және Жезқазғанда әскери қалашықтар, Орал, Қызылорда және Атырауда казармалар, сондай-ақ Ұлттық ұлан академиясының ғимараттары мен құрылыстарының құрылысы жалғасып жатқаны айтылған. Жеті нысанды күрделі жөндеуден өткізуге келісімшарттар жасалды.
Жиын соңында ішкі істер министрі Ержан Саденов жаңадан келген сарбаздармен жұмысты жақсартуды, тәртіпті қадағалауды, сарбаздарды аялауды және әскери бөлімдердегі техника мен ғимараттарды жаңартуды жалғастыруды тапсырды.
Бұған дейін Қазақстан Президенті Қасым-Жомарт Тоқаев ішкі істер министрі Ержан Саденовті қабылдап, ол ведомствоның тоғыз айлық жұмысының қорытындысы туралы баяндады. ІІМ дерегінше, елдегі қылмыс деңгейі 15%-ға төмендеген — нақты сандармен айтқанда, былтырғымен салыстырғанда 11 мың құқық бұзушылық аз тіркелген.