Ulybrıtanıanyń Ferford áýe bazasy mańynda ustalǵan bes azamat kepilmen qamaýdan bosatyldy. Bul sheshim AQSh tarapynyń narazylyǵyn týdyrdy, dep habarlaıdy infohub.kz saıty.
AQSh Memlekettik hatshysy Marko Rýbıo kúdiktilerdiń bosatylýyna alańdaýshylyq bildirip, iske sheteldik kúshterdiń aralasýy múmkin ekenin joqqa shyǵarmady. Ol Fox News arnasyna bergen suhbatynda: «Bul — óte aýyr jaǵdaı. Oqıǵaǵa sheteldik oıynshynyń qoly aralasqany anyq», — dedi. Alaıda naqty dálelder keltirilmedi.
AQSh Prezıdenti Donald Tramp ta kúdiktilerdiń bosatylýyna qatysty pikir bildirip, bul sheshimdi qate dep sanaıdy. «Biz olar týraly bárin bilemiz. Biz olardy bosatpas edik», — dedi Tramp Aq úıdegi jýrnalıserge. Irannyń osy iske qatysy bar-joǵy týraly suraqqa ol: «Bolýy múmkin», — dep jaýap berdi.
Ulybrıtanıanyń Leıborısik partıasy jetekshisiniń orynbasary Lúsı Paýell Lıverpýlde ótken partıa konferensıasynda kúdiktilerdiń bosatylýyna qatysty pikir bildirdi. Ol bul sheshimdi polısıanyń jedel qyzmetine jatqyzyp, mınıstrlerdiń aralasýyna jol berilmeıtinin atap ótti. «Kepil jáne osyǵan uqsas sheshimderdi polısıa qabyldaıdy, olardy mınıstrler qabyldamaıdy jáne qabyldamaýy kerek. Men polısıaǵa senemin», — dedi ol Sky News arnasyna.
Bes kúdikti — Londonnan kelgen 20 jastaǵy brıtandyqtar. Olar Glostershırde jeksenbi kúni tańerteń jarylǵysh zattardy qoldanýǵa jáne terorıstik akt jasaýǵa daıyndyq jasady degen kúdikpen ustalǵan. Oqıǵa Iranmen baılanysty bolýy múmkin degen boljamdar da bar.
Ulybrıtanıanyń Terorızmge qarsy kúres polısıasynyń basshysy Loýrens Teılor kúdiktilerdiń bosatylýy tergeýdiń aıaqtalǵanyn bildirmeıtinin, olarǵa qatań sharttar qoıylǵanyn málimdedi. Tergeý jalǵasýda, polısıa ázirge sebep-saldardy anyqtaǵan joq.
Aldyn ala málimetterge súıensek, kúdiktiler Ferford bazasyna eki mıl qashyqtyqta ornalasqan Ýelford aýylynda úsh mıkroavtobýspen ustalǵan. Kólikterdiń artynan kúdikti materıaldar tabylǵan. Bastapqy saraptama jarylǵysh zattar bolýy múmkin degen kúdik týdyrǵanymen, keıin naqty jarylǵysh zat tabylmaǵan.
Kúdiktilerdi bir fermer áıel baıqap qalǵan. Ol olardyń betperde kıgenin jáne kólik jaryǵy túskende qashyp ketkenin aıtyp, polısıaǵa habarlasqan.
Ferford áýe bazasy — AQSh áskerı-áýe kúshteriniń Eýropadaǵy bombalaýshy ushaqtary ornalasqan negizgi bazasy. Ol Iranǵa qarsy áskerı operasıalarda paıdalanylǵan. Irannyń Islam revolúsıalyq gvardıa korpýsy buǵan deıin AQSH-tyń Iranǵa shabýyl jasaý úshin paıdalanatyn kez kelgen bazasyn «zańdy nysana» dep ataǵan bolatyn.
Irannyń Londondaǵy elshiligi alaıda bes kúdiktiniń ustalýyna qatysty kez kelgen aıyptaýdy úzildi-kesildi joqqa shyǵardy.