Ulytaý oblysynda jańǵyrtýdan keıin jolaýshylarǵa tórt temirjol vokzaly qaıta ashyldy. Jańartylǵan nysandar Jezqazǵan jáne Qarajal qalalarynda, Jańaarqa aýdanynda jáne Qyzyljar stansıasynda ornalasqan, dep habarlaıdy infohub.kz saıty.
Jumystar Memleket basshysy Qasym-Jomart Kemeluly Toqaevtyń tapsyrmasyna sáıkes jáne úkimettiń qoldaýymen elimizdegi 125 temirjol vokzalyn jańǵyrtý jobasy aıasynda atqaryldy. Jobany júzege asyrý Qazaqstan Respýblıkasy Kólik mınıstrliginiń, «Samuryq-Qazyna» aksıonerlik qoǵamynyń, «Qazaqstan temir joly» ulttyq kompanıasy» aksıonerlik qoǵamynyń jáne Ulytaý oblysy ákimdiginiń birlesken jumysynyń nátıjesi boldy.
Jańartylǵan vokzaldar zamanaýı talaptarǵa saı jabdyqtalyp, jolaýshylarǵa qolaıly jaǵdaı jasaıdy. Ulytaý oblysynyń ákimi Eset Baıken vokzaldardy jańǵyrtý óńirdiń kólik ınfraqurylymyn damytýdaǵy mańyzdy qadam ekenin atap ótti.
«Memleket basshysynyń tapsyrmasymen salynyp jatqan Qyzyljar — Moıynty temirjol jelisi óńirimizdiń damýyna jańa serpin berip qana qoımaı, elimizdiń tranzıttik áleýetin de arttyrary sózsiz. Jalpy oblysta kólik ınfraqurylymyn damytý boıynsha aýqymdy jumystar júrgizilýde. Temirjol qatynasyn jaqsartýmen qatar, avtomobıl joldarynyń sapasyn arttyrýǵa basym kóńil bólinýde. Jezqazǵan — Qyzylorda avtojolyndaǵy jumystar 90 paıyzǵa oryndaldy. Jaqyn aılarda qozǵalys ashylady dep josparlanýda. Jezqazǵan — Qaraǵandy baǵytynda aǵymdaǵy jyly jer tósemesin salý jáne materıaldyq-tehnıkalyq qamtamasyz etý jumystaryn tolyq aıaqtaý josparlanýda. Sonymen qatar, Ulytaý — Arqalyq jolynyń 89 shaqyrymdyq ýchaskesin jóndeý qazan aıynda aıaqtalady», — dedi oblys ákimi.
Jezqazǵan temirjol vokzalynyń ǵımaraty 1941 jyly salynǵan. Sodan beri ol alǵash ret keshendi jańǵyrtýdan ótti. Joba aıasynda vokzal ǵımaratynyń aýdany 541 sharshy metrden 2 500 sharshy metrge ulǵaıtyldy. Jańartylǵan vokzal bir ýaqytta 500-ge jýyq jolaýshyny qabyldap, táýligine 2 myń adamǵa deıin qyzmet kórsete alady.
Qazirgi tańda Ulytaý oblysy elimizdiń alty oblysymen temirjol qatynasymen baılanysqan. Jańǵyrtylǵan vokzaldar óńir turǵyndary men qonaqtary úshin qolaıly ári qaýipsiz jaǵdaı jasaýǵa múmkindik beredi.