Ulytaý oblysy Jaırem kentindegi úılený toıy kerýenine qatysqan segiz avtokólik aıypturaqqa qoıylyp, júrgizýshileri jol erejesin óreskel buzǵany úshin jaýapqa tartyldy, dep infohub.kz saıty habarlaıdy.
Polısıanyń málimetinshe, áleýmettik jelilerdi monıtorıńteý barysynda kenttegi meıramhanalardyń birinde uıymdastyrylǵan úılený toıy kerýeniniń qatysýshylary jol erejesin óreskel buzǵany anyqtalǵan. Avtokólik sherýiniń uıymdastyrýshysy jáne júrgizýshileri ereje buzǵan segiz kólik anyqtaldy.
Barlyq avtokólik arnaıy aıypturaqqa qamaldy. Júrgizýshiler usaq buzaqylyq, qaýipsizdik beldigin taqpaý, qarsy jolaqqa shyǵý, kólik quraldaryn paıdalaný erejesin buzý, avtokólikti paıdalaný kezinde belgilengen talaptardy saqtamaý, sondaı-aq basqa jol júrisine qatysýshylarǵa apattyq jaǵdaı týǵyzǵany úshin jaýapqa tartyldy.
«Polısıa azamattardy jol erejesin qatań saqtaýǵa shaqyrady. Úılený toıy kerýenderi, merekelik sherýler jáne basqa da saltanatty is-sharalar zańdy buzýǵa jáne aınaladaǵylardyń ómiri men densaýlyǵyna qaýip tóndirýge negiz bola almaıdy», - dedi tártip saqshylary.