Jerorta teńizińde bıiktigi bir metrden asatyn sýnamı týyndaý yqtımaldyǵy aldaǵy otyz jylda 100%-ǵa jýyq dep eskertedi sarapshylar, dep habarlaıdy infohub.kz saıty.
ScienceDaily basylymynyń jazýynsha, Fransýz Rıverasy sýnamıdiń aýyr qaýpine tap bolyp otyr. Keıbir jergilikti senarılerde alǵashqy tolqyndar jaǵalaýǵa 10 mınýttan az ýaqytta jetýi múmkin. Al Fransıanyń ulttyq eskertý ortalyǵyna jer silkinisinen keıin bılikke alǵashqy dabyl jiberý úshin 15 mınýtqa deıin ýaqyt qajet.
Osyǵan baılanysty Nıssa mańyndaǵy ǵalymdar men jergilikti sheneýnikter jaıaý evakýasıa baǵyttaryn ázirlep, baspana oryndaryn belgilep, adamdar qaýipti aımaqtardan ýaqytynda shyǵa alýy úshin jattyǵýlar ótkizýde.
Jerorta teńizi aımaǵynda qaýipti tolqyndardyń týyndaýyna qajetti barlyq áleýet bar. Sebebi Lıgýrıa teńizindegi belsendi jarylymdar boıyndaǵy jer silkinisteri nemese kóshkinder bolýy múmkin. Tarıhta 1887 jyly jer silkinisi Kann men Antıbte eki metrlik tolqyndar týdyrǵany, sondaı-aq 1979 jyly Nıssadaǵy kóshkin segiz adamnyń ómirin qıǵany este qaldy. Mamandar tipti alasa tolqyndardyń ózi joǵary jyldamdyǵy men kúshti aǵysyna baılanysty qaýipti bolýy múmkin ekenin atap ótedi.
Táýekelderdi azaıtý úshin Monpele ýnıversıtetiniń mamandary teńiz deńgeıinen bes metrden tómen jáne jaǵalaýdan 200 metrge deıingi aýmaqty qamtıtyn evakýasıa aımaǵyn anyqtady. Nıssa metropolıasynda Kógildir jaǵalaýda 100-ge jýyq baspana jasalyp, qaýipsiz joldar salyndy. Júrgizilgen jumystyń arqasynda metropolıa IýNESKO-dan Tsunami Ready mártebesin aldy, bul aımaqtyń yqtımal apatqa joǵary daıyndyǵyn rastaıdy.