Nú-Iorkte tenısten AQSh ashyq chempıonatynyń — bıylǵy «Úlken dýlyǵa» týrnıriniń jerebesi ótti. Qazaqstandyq tenısshiler jeke syndaǵy alǵashqy qarsylastaryn bildi, dep habarlaıdy infohub.kz saıty.
Álemniń ekinshi raketkasy Elena Rybakına ahıll jaraqatyna baılanysty mıkstten bas tartqan edi, al birinshi aınalymda ol uıymdastyrýshylardan ýaıld-kard alǵan amerıkalyq Teıa Frodınmen (reıtıńte 580-oryn) kezdesedi. Iýlıa Pýtınseva (80) startta shveısarıalyq Belında Benchıchpen (12), mıkst fınalısimen oınaıdy.
Aleksandr Býblık (16) alǵashqy aınalymda amerıkalyq Djeffrı Výlfpen (248), al Aleksandr Shevchenko (97) horvat Dıno Prızmıchpen (101) baq synaıdy.
Tımofeı Skatov (205) US Open jeke synynda besinshi qazaqstandyq bola alar edi, biraq irikteýdiń ekinshi raýndynda bolgarıalyq Grıgor Dımıtrovten (137) 6:7, 5:7 (4:6) esebimen utyldy. Oǵan deıin Petropavldyq týma belgıalyq Jıl Arno Beılıdi (240) 6:4, 6:2 esebimen jeńgen bolatyn.
Qazaqstandyqtar qatysatyn juptyq jáne ıýnıorlyq týrnırlerdiń jerebesi keıinirek belgili bolady.
Ekinshi jyl qatarynan jańa formatta ótip jatqan mıkst jarysynda cheh tenısshileri Karolına Mýhova men Iakýb Menshık jeńimpaz atandy. Olar búgingi fınalda shveısarıalyq-ıtalıalyq jup Belında Benchıch/Flavıo Kobollıdi 6:3, 1:6, 10:6 esebimen tize búktirdi.
AQSh ashyq chempıonaty — hardta ótetin jyl saıynǵy «Úlken dýlyǵa» týrnıri. Kúntizbelik jyldaǵy tórt meıdjordyń sońǵysy.
Alǵash ret 1881 jyldyń tamyzynda ótken US Open ekinshi jyl qatarynan mıkst týrnıriniń kestesine baılanysty bir apta erte bastalady. Jalpy júlde qory — $108 mln — meıdjorlar arasynda rekordtyq.
1978 jyldan beri machtar Nú-Iorktegi Bıllı Djın Kıng atyndaǵy Ulttyq tenıs ortalyǵynda ótedi.
Erler arasynda qazirgi chempıon — ıspanıalyq Karlos Alkaras (3), ótken jylǵy fınalda Iannık Sınnerdi 6:2, 3:6, 6:1, 6:4 esebimen jeńgen edi. Aıtpaqshy, álemniń birinshi raketkasy ıtalıalyq tize jaraqatyna baılanysty US Open-2026-dan bas tartty.
Áıelder arasynda 2025 jylǵy jeńimpaz — belarýs Arına Sobolenko. Sheshýshi machta ol amerıkalyq Amanda Anısımovany 6:3, 7:6 (7:3) esebimen utty.