Qazaqstanda paıdalanýdan shyqqan kólikterdi qaıta óńdeý baǵdarlamasyn qaıta bastaýǵa daıyndyq júrip jatyr, dep habarlaıdy infohub.kz saıty.
Eski kólik ıeleri olardy qaıta óńdeýshilerge tapsyryp, Qazaqstanda shyǵarylǵan ekologıalyq taza kólik satyp alýǵa jeńildik sertıfıkatyn ala alady.
Ekologıa jáne tabıǵı resýrstar mınıstrliginde habarlaǵandaı, baǵdarlama eki kezeńmen júzege asyrylady: qaıta óńdeýshi kásiporyndarmen kelisimshart jasasý jáne kólik pen aýyl sharýashylyǵy tehnıkasyn qaıta óńdeýge ótinimderdi qabyldaý jáne qaraý. Kólik qabyldaýdyń naqty merzimi ázirge belgisiz. Aldymen «Jasyl damý» qaıta óńdeýshilerdi anyqtap, olarmen tıisti kelisimsharttar jasasýy kerek. Odan keıin qabyldaý pýnktteriniń tizimi paıda bolady.
Kólikti qaıta óńdeýge tapsyrǵannan keıin avtokólik ıesine jeńildik sertıfıkaty beriledi. Jeńildik mólsherin ındýstrıalandyrý salasyndaǵy ýákiletti memlekettik organ anyqtaıdy. Sertıfıkat berilgen kúnnen bastap bir jyl boıy jaramdy bolady. Sonymen qatar, ıesi sertıfıkatty basqa adamǵa bere alady — biraq úsh retten kóp emes. Bir kólik satyp alýǵa eki sertıfıkatqa deıin, al aýyl sharýashylyǵy tehnıkasyn satyp alýǵa tórt sertıfıkatqa deıin paıdalanýǵa bolady. Jeńildik sertıfıkattary qaıta óńdeý alymy qarajaty esebinen qarjylandyrylady.
Baǵdarlamaǵa qara metaldy qaıta óńdeýmen aınalysatyn kásiporyndar qatysa alady. Bul rette qaıta óńdeýden keıingi qaldyqtardyń úlesi qabyldanǵan kólikter massasynyń 5 paıyzynan aspaýy tıis. Sondaı-aq, qazir qaıta óńdeýshi kásiporyndar joq óńirlerde qosymsha qabyldaý pýnktterin ashý kózdelýde.
Aldyńǵy qaıta óńdeý baǵdarlamasy 2016 jyldan 2022 jyldyń qańtaryna deıin jumys istedi. Osy ýaqyt ishinde Qazaqstanda 219 myńǵa jýyq kólik quraly qabyldandy, onyń ishinde 215,4 myń avtomobıl jáne 3,5 myń aýyl sharýashylyǵy tehnıkasy.