AQSh ǵalymdary uıqy problemalary mıdaǵy neırondyq baılanystarǵa jasyna qaraı ártúrli áser etetinin anyqtady. Egde jastaǵy áıelderde mundaı ózgerister demensıanyń erte qaýpin bildirýi múmkin, dep habarlaıdy infohub.kz.
Bıngemton ýnıversıteti men Alabama ýnıversıtetiniń zertteýshileri 1300-den astam qatysýshynyń MRT sýretterin taldady. Zertteý nátıjeleri "Neurobiology of Aging" ǵylymı jýrnalynda jarıalandy. Nashar uıyqtaıtyn stýdentterde qozǵalysqa jaýap beretin mı aımaqtary shamadan tys belsendi ekeni anyqtaldy — dene fızıkalyq turǵydan demalýǵa daıyn emes. Al 65 jastan asqan egde adamdarda bul aımaqtar kerisinshe pasıvti, biraq kognıtıvti aımaqtardyń belsendiligi joǵary.
Egde jastaǵy áıelderde ǵalymdar erekshe qaýipti úlgilerdi anyqtady. Nashar uıqy kezinde olarda este saqtaýǵa jaýapty DMN (mıdyń pasıvti rejım jelisi) men zeıindi baqylaıtyn FPN (frontoparıetaldy jeli) arasynda gıperbaılanys paıda bolady. Zertteýdiń seriktes avtory Ian Makdonoýdyń aıtýynsha, bul anomalıa este saqtaýdy tikeleı nasharlatady jáne Alsgeımer aýrýynyń klınıkaǵa deıingi «tynysh» satysyndaǵy prosesterdi eske túsiredi. Uıqy aldyndaǵy shamadan tys qozýdy azaıtý úshin jastarǵa kúndelik júrgizý, al egde adamdarǵa ýaqytynda dárigerge qaralý usynylady.