Qazaqstanda vaksınalardy saqtaý men tasymaldaýdy sıfrlyq baqylaý jyl saıyn 500 mln teńgege deıin únemdeýge múmkindik beredi. «Sýyq tizbekti» baqylaý júıesin 2026 jyldyń sońyna deıin elimizdiń barlyq óńirine taratý josparlanyp otyr, dep habarlady Densaýlyq saqtaý mınıstrligi, dep jazady infohub.kz saıty.
Densaýlyq saqtaý mınıstri Aqmaral Álnazarovanyń aıtýynsha, pılottyq joba alǵash ret 2025 jyly Qaraǵandy oblysynda synaqtan ótti. Júıeni keńeıtý «Qazaqtelekommen» birlesip júrgizilýde.
«Jalpy vaksına kóleminiń shamamen 1,5%-y jyl saıyn búliný men «sýyq tizbekti» baqylaýdyń joqtyǵynan esepten shyǵarylady, bul jylyna shamamen 400-450 mıllıon teńgeni quraıdy», — dedi Álnazarova premer-mınıstrdiń qatysýymen ótken sıfrlandyrý jónindegi keńeste.
Jańa mehanızm vaksınalardyń barlyq jolyn — qoımalardy, tasymaldaýdy jáne medısınalyq uıymdardy qamtýy tıis. Biryńǵaı júıege 3,5 myńnan astam nysan men 21 myńnan astam temperatýralyq baqylaý núktesin biriktirý josparlanýda.
Tasymaldaý kezinde temperatýralyq kórsetkishter jol boıy baqylanady, al arnaıy kóliktiń qozǵalysy GPS arqyly qadaǵalanady. Sonymen qatar medısınalyq uıymdar tońazytqysh jabdyqtaryn jańartýdy jalǵastyrýda.
Densaýlyq saqtaý mınıstrligi biryńǵaı sıfrlyq júıe vaksınalardy saqtaý men tasymaldaý jaǵdaılaryn naqty ýaqyt rejıminde baqylaýǵa jáne temperatýralyq rejımniń buzylýynan esepten shyǵarylatyn preparattar kólemin azaıtýǵa múmkindik beredi dep úmittenedi.
Buǵan deıin «Kýrsıv» «sýyq tizbekti» sıfrlyq baqylaý júıesi el boıynsha 800-ge jýyq arnaıy kólikti qamtýy tıis ekenin jazǵan. Sondaı-aq Densaýlyq saqtaý mınıstrligi medısınalyq uıymdar úshin 900-den astam tońazytqysh, jańa tońazytqysh kameralar men muzdatqyshtar satyp alýdy josparlap otyr. Bas sanıtarlyq dáriger Sarhat Beısenova jabdyqtardan alynǵan derekter biryńǵaı sıfrlyq platformaǵa avtomatty túrde túsetinin, bul temperatýralyq rejımniń buzylýyn jedel anyqtaýǵa múmkindik beretinin habarlaǵan bolatyn.