Shetel valútasyndaǵy jınaq depozıtteri boıynsha eń joǵary mólsherleme jyldyq 2,5%-ǵa deıin kóteriledi. Alaıda jańa sharttarmen salym ashý 1 qazannan bastap qana múmkin bolady. Bul týraly Qazaqstannyń depozıtterge kepildik berý qory habarlady, dep jazady infohub.kz saıty.
Qazaqstannyń depozıtterge kepildik berý qorynyń (QDKQ) túsindirýinshe, 1 qazannan bastap jeke tulǵalardyń shetel valútasyndaǵy depozıtteri boıynsha mólsherlemelerdi retteýdi yryqtandyrý bastalady. Buǵan deıin mundaı salymdardyń barlyq túri boıynsha mólsherleme 1%-dan aspaýǵa tıis edi.
Endi merzimi 12 aıdan asatyn jınaq depozıtteri boıynsha mólsherleme jyldyq 1%-dan 2,5%-ǵa deıin kóterilýi múmkin. Sóz qarajatty merziminen buryn alýǵa qatań shekteý qoıylǵan — tipti barlyq syıaqydan aıyrylýǵa deıingi salymdar týraly bolyp otyr. Jańa mólsherlemeler tek 2026 jylǵy 1 qazannan bastap ashylǵan nemese uzartylǵan depozıtterge qoldanylady.
Atalǵan mólsherlemeler shetel valútasyndaǵy depozıtter úshin usynylatyn joǵarǵy shek bolyp sanalady. Bankter qandaı mólsherleme belgileýdi ózderi tańdaıdy. Sonymen qatar kez kelgen merzimdegi merzimdi salymdar, sondaı-aq merzimi 12 aı jáne odan qysqa jınaq depozıtteri boıynsha shekti mólsherlemeler ózgerissiz qalady — 1%.
QDKQ sondaı-aq jeke tulǵalardyń shetel valútasyndaǵy salymdary boıynsha eń joǵary kepildik 5 mln teńgege deıin ekenin eske saldy.
Eske salaıyq, 21 qyrkúıekte Ulttyq bank tóraǵasynyń orynbasary Álıa Moldabekova suhbat barysynda teńgeniń nyǵaıýy jáne valútalyq salymdar úlesiniń azaıýy valútalyq depozıtter boıynsha mólsherlemelerdi kezeń-kezeńimen yryqtandyrýǵa kirisýge múmkindik beretinin aıtqan bolatyn.
Keıinirek sarapshylar «Kýrsıvke» bankter valútalyq depozıtter boıynsha mólsherlemelerdi kóterýge asyqpaıtynyn aıtty.