Qazaqstannyń Joǵary aýdıtorlyq palatasy elde quramany erip júretin «artyq adamdarǵa» qatysty normatıvtiń engizilgenin eske saldy, dep habarlaıdy infohub.kz saıty.
VAP baspasóz qyzmetiniń málimetinshe, júrgizilgen aýdıtten keıin «artyq erip júrýshilersiz» qaǵıdaty boıynsha sporttyq delegasıalar týraly jańa normatıv bekitildi. Bul normatıvti QR Týrızm jáne sport mınıstrligi bekitken.
Qujat qazaqstandyq sportshylardy keshendi jarystarda erip júretin delegasıalar quramyn retteıtini habarlandy. Oǵan Tokıodaǵy 2020 jylǵy Olımpıada oıyndaryna daıyndyqqa bólingen búdjet qarajatyn paıdalaný tıimdiligine júrgizilgen memlekettik aýdıt negiz boldy.
«Tekserý barysynda ulttyq delegasıany qalyptastyrý kezinde bekitilgen baǵdardyń joqtyǵy anyqtaldy: bir sportshyǵa qansha jattyqtyrýshy, dáriger, massajıst, psıholog, shtab ókilderi men laýazymdy tulǵalar tıesili bolýy kerek. Erip júretin personal sany ár jaǵdaıda jeke anyqtaldy, biryńǵaı ádistemelik negiz bolmady, bul olardyń issapar shyǵyndarynyń negizdiligin baǵalaýǵa múmkindik bermedi», — dep atap ótti VAP-ta.
Endi delegasıalar quramy naqty belgilengen proporsıalar boıynsha qalyptastyrylady, bul shyǵyndardy boljamdy jáne tekseriletin etedi. Bul rette sportshylarmen tikeleı jumys isteıtin jattyqtyrýshylar men medısınalyq blok mamandaryna basymdyq beriledi.
«Jalpy, qabyldanǵan shara búdjet shyǵyndarynyń ashyqtyǵyn arttyrýǵa, olardy baqylaýdy kúsheıtýge jáne sporttyq delegasıalarǵa negizsiz shyǵyndar táýekelin azaıtýǵa múmkindik beredi», — dep qosty VAP-ta.
Osy jyldyń aqpan aıynda Qazaqstannyń týrızm jáne sport mınıstri Erbol Myrzabosynov Italıadaǵy 2026 jylǵy qysqy Olımpıada oıyndaryna qatysýshylardy erip júrgen delegasıa týraly pikir bildirgen edi. Ol «ol jaqqa birde-bir artyq adam barmaǵanyn» málimdedi.