Venesýelada 24 maýsymda bolǵan eki qýatty jer silkinisinen qaza tapqandar sany 5069 adamǵa jetti. Bul týraly 17 shildede eldiń Ulttyq Assambleıasynyń tóraǵasy Horhe Rodrıges málimdedi, dep habarlaıdy infohub.kz saıty.
Sońǵy málimetter boıynsha, 16 740 adam jaraqat aldy, taǵy 17 907 turǵyn baspanasyz qaldy. İzdestirý-qutqarý operasıasy kezinde 6462 adam tabyldy, al 37 myńǵa jýyq zardap shekkenge medısınalyq kómek kórsetildi.
Stıhıa 190 ǵımaratty tolyǵymen qıratty, taǵy 856 nysan qatty zaqymdandy. Eń aýyr zardaptar eldiń jaǵalaý aımaqtaryna tıdi, onda qaza tapqandardyń kópshiligi tirkelgen.
Úılerinen aıyrylǵan myńdaǵan adam ýaqytsha lagerlerde qalýda. AFP aqparatyna sáıkes, olardyń kóbi tolyp, aýyz sý men sanıtarlyq jaǵdaılardyń tapshylyǵyn sezinýde.
Apatty «seısmıkalyq dýplet» dep atalatyn qubylys týdyrdy — 24 maýsym keshinde bir mınýttan az ýaqyt aralyǵymen bolǵan magnıtýdasy 7,2 jáne 7,5 bolatyn eki qýatty jer silkinisi. Eki dúmpýdiń de epısentrleri Karıb jaǵalaýyndaǵy Moron qalasynyń mańynda, Karakastan shamamen 168 shaqyrym jerde ornalasqan.
Tabıǵı apattyń zardaptaryn joıý úshin Venesýela bıligi Halyqaralyq valúta qoryndaǵy óz resýrstaryn paıdalanyp, 346 mıllıon dollar bóldi.
Eske salaıyq, 1 shildede Venesýela prezıdentiniń mindetin atqarýshy Delsı Rodrıges elde jer silkinisi qurbandaryna arnalǵan jeti kúndik ulttyq aza tutýdy jarıalaǵan bolatyn. Sol kezde resmı qaza tapqandar sany shamamen 2300 adamdy quraǵan edi, alaıda qutqarý jumystary júrgizilgen saıyn bul kórsetkish eki eseden astamǵa ósti.