Vengrıada 24 jastaǵy er adam mas kúıinde jeńil ushaqty urlap, «Paksh» atom elektr stansıasyna bet aldy. Áskerıler áýe kemesin ustaý úshin eki joıǵysh ushaqty kóterdi, dep habarlaıdy infohub.kz saıty.
Oqıǵa 29 tamyzda tańerteń boldy. Er adam Kalocha qalasyndaǵy aerodromda turǵan ushaqqa ruqsatsyz otyryp, Vengrıadaǵy jalǵyz AES ornalasqan Paksh qalasyna qaraı ushty.
Áskerı radarlar áýe kemesin birden anyqtady. Osydan keıin kezekshiliktegi Gripen joıǵysh ushaqtary áýege kóterildi, dedi Vengrıanyń qorǵanys mınıstri.
«Paksh» AES-inen úsh shaqyrym radıýstaǵy áýe keńistigi azamattyq avıasıa úshin 6 myń metr bıiktikke deıin jabyq. Vengrıalyq BAQ derekterine sáıkes, urlanǵan ushaq stansıa mańynda qaýipti manevrler jasaǵan.
Birneshe mınýttan keıin ol Geren eldi mekeniniń janyndaǵy kúnbaǵys alqabyna májbúrli qoný jasady. Er adam zaqymdalǵan ushaqty tastap, tas jolǵa shyqqan.
Vengrıa polısıasynyń habarlaýynsha, bir avtokólik júrgizýshisi er adamǵa kómektesý úshin toqtaǵan. Ol kólikke otyryp, ketýge tyrysqan, alaıda ishindegi jolaýshy oǵan kedergi jasaǵan.
Polısıa kúdiktini birneshe mınýt ishinde ustady. Tekserý er adamnyń mas kúıinde bolǵanyn rastady. Quqyq qorǵaý organdary onyń basqa da zattardy qoldanǵanyn anyqtap jatyr.
Ustalǵan adamǵa qatysty kólik quralyn zańsyz ıemdený jáne basqa da boljamdy qylmystar boıynsha is qozǵaldy. Polısıa ony qamaýǵa alýdy suramaq.
Oqıǵadan keıin polısıa avıasıalyq organdarmen birlesip, Kalochadaǵy aerodromda tekserý bastady. Vengrıanyń basqa áýejaılarynda da osyndaı tekserýler júrgizý josparlanýda.