Vengrıa prezıdenti Tamash Shýıok óz ókilettigin toqtatatyn konstıtýsıaǵa túzetýge qol qoıdy. 20 shildeden bastap memleket basshysynyń mindetin parlament spıkeri ýaqytsha atqarady, dep habarlaıdy infohub.kz.
Shýıok áleýmettik jelilerde osy túzetýge qol qoıǵanyn habarlady. «Meniń qoltańbam – respýblıka prezıdentiniń mindetterine jáne prezıdenttik ınstıtýttyń ózine degen tolyq jáne sózsiz qurmettiń sońǵy móri. Bul – men Vengrıanyń Ata Zańyn sońyna deıin saqtap, buzbaǵanymnyń belgisi», – dedi ol beıneúndeýinde.
Saıasatker parlament qabyldaǵan túzetýge «qarsy turýdyń konstıtýsıalyq quraldary» joq ekenin málimdedi.
Vengrıa premer-mınıstri Peter Madár 20 shildeden bastap prezıdenttiń ókilettigin parlament spıkeri Agnesh Forsthoffe ýaqytsha atqaratynyn málimdedi. Jańa prezıdent 30 kún ishinde saılanady.
Eske sala keteıik, Peter Madár parlament saılaýynda jeńiske jetkennen keıin birden el prezıdentine qatysty ımpıchment prosedýrasyn bastaý nıetin bildirgen bolatyn. Keıin ol Shýıoktan prezıdent qyzmetinen ketýdi talap etti, alaıda saıasatker bul talaptardy elemedi. Sondaı-aq ol Madárdy konstıtýsıany óreskel buzdy dep aıyptady.