«Soprano» telehıkaıasyndaǵy Salvatore «Úlken Mysyq» Bonpensero rólimen tanymal akter Vınsent Pastore 80 jasynda dúnıeden ozdy. Bul týraly infohub.kz saıty habarlaıdy.
Pastore 1980 jyldardan beri kıno áleminde belsendi jumys istep, «Slavnye parnı» jáne «Probýjdenıe» syndy iri fılmderde oınaǵan. Ol kóbinese gangster rólderin somdaǵan, al onyń eń tanymal keıipkeri — Tonı Sopranonyń dosy, FBR-ǵa aqparat berýshige aınalǵan Salvatore «Úlken Mysyq» Bonpensero boldy. Bul róldi ol 30 epızodta oryndady.
Pastore Nú-Iorktegi Bronks aýdanynda dúnıege kelip, Nú-Roshel qalashyǵynda ósken. Vetnam soǵysy kezinde áskerı-teńiz flotynda qyzmet etken, keıin Peıs ýnıversıtetinde bilim alǵan. Onyń Rene Pastore esimdi qyzy bar.
Akterdiń menedjeri Bob Makgoýen onyń qaıtys bolǵanyn Associated Press agenttigine habarlady. Ol Pastore týraly: «Ol eń adal klıent edi, árqashan qaıyrymdylyqqa aqsha bóletin. Kez kelgen adamǵa kómektesýge daıyn jan edi, bul meniń salamda sırek kezdesedi», — dedi.
Makgoýenniń aıtýynsha, ol Pastoremen birneshe kún boıy baılanysa almaǵan soń, onyń Long-Aılendtegi úıinen tabylǵan. Qaıtys bolý sebebi ázirge aıtylmaǵan.