Ilon Masktyń 22 jastaǵy transgender qyzy Vıvıan Ýılson ıspandyq sán brendi Desigual-diń «Boısunbaý úshin týǵandar» atty kúzgi jarnama naýqanyna qatysty. Bul naýqan ózin-ózi erkin kórsetý men jasandy ıntellektke synı kózqarasqa arnalǵan, dep habarlaıdy infohub.kz.
Jarnamalyq rolıkte Ýılson kúndelikti isterge kómektesý úshin jasalǵan DESI 84 robotymen árekettesedi. Alaıda qarapaıym tapsyrmalardy oryndaýdyń ornyna, model robotty ol kótere almaıtyn standartty emes jaǵdaılarǵa qoıady. Osylaısha brend zamanaýı tehnologıalardyń shekteýli ekenin kórsetedi.
Ýılsonnyń aıtýynsha, ol Desigual-men yntymaqtastyqqa brendtiń sánge degen jarqyn ári erekshe kózqarasy sebep bolǵan. Sonymen qatar ol jasandy ıntellekt taqyrybyn qozǵaýdy mańyzdy dep sanaǵan.
«Ol talantty shyǵarmashyl adamdardyń jumys oryndaryn tartyp alyp, qorshaǵan ortaǵa zıan keltiredi», — dedi Ýılson People basylymyna bergen suhbatynda.
Ol sondaı-aq jasandy ıntellekt adamnyń emosıasy men naǵyz shyǵarmashylyqty almastyra almaıdy dep esepteıdi.
Rolıkte bir ıronıalyq sát bar: DESI 84 robotyn shyn máninde adam oınaǵan. Desigual-de adam tarıhta alǵash ret «robottyń jumysyn tartyp aldy» dep ázildegen.
Ýılson Ksave Aleksandr Mask degen esimmen dúnıege kelgen. 2020 jyly ol transgender ekenin jarıalap, aty-jónin ózgertken. Ýılson LGBTK+ quqyqtary men basqa da áleýmettik máseleler týraly ashyq aıtady.
Ýılsonnyń ákesimen qarym-qatynasy shıelenisken kúıinde qalyp otyr. Mask onyń aýysýy týraly ashyq aıtyp, vokızmge (násildik, genderlik jáne áleýmettik ádilettilik máselelerine erekshe nazar aýdarýdy bildiretin saıası jáne áleýmettik termın) qatysty ıdeıalardy birneshe ret synǵa alǵan.
Buǵan deıin «Kýrsıv» amerıkandyq mıllıarder Ilon Masktyń jahandyq jylyný máselesin qalaı sheshýge bolatynyn biletinin jazǵan bolatyn. Onyń pikirinshe, jahandyq jylyný máselesin Kún men Jer arasyna spýtnıkter ornalastyrý arqyly sheshýge bolady.