Shyǵys Qazaqstan oblysy tabıǵı apattyń saldaryn joıýdy jalǵastyrýda. Oblys ákimi Nurymbet Saktaǵanov tótenshe qyzmetter, komýnaldyq jáne energetıkalyq uıymdardyń basshylarymen, sondaı-aq qala jáne aýdan ákimderimen jedel keńes ótkizip, aǵymdaǵy jaǵdaıdy baǵalap, basym mindetterdi aıqyndady, dep habarlaıdy infohub.kz.
Keńeste aldyńǵy kúni jeldiń jyldamdyǵy 19 m/s-qa jetip, 20,5 mm jaýyn-shashyn túsken tabıǵı apattyń saldaryn joıý qorytyndylary aıtyldy. 25 myńnan astam tutynýshyǵa elektr qýaty qalpyna keltirildi. Avarıalyq-qalpyna keltirý jumystaryna TJD-niń 148 qyzmetkeri men 27 birlik arnaıy tehnıka jumyldyryldy.
Ulan aýdanynda qatty jel mekteptiń, eki qabatty turǵyn úıdiń jáne Óskemen qus fabrıkasynyń úsh ǵımaratynyń shatyryn zaqymdady. Jalpy zaqymdaný aýdany myń sharshy metrden asty. Baqytymyzǵa oraı, qaza tapqandar men zardap shekkender joq. Zaqymdalǵan nysandardyń turǵyndaryna 100 AEK mólsherinde ataýly áleýmettik kómek kórsetý qarastyrylǵan.
Óskemende tabıǵı apattyń negizgi saldary qysqa merzimde joıyldy: qulaǵan aǵashtardan magıstraldyq joldar úsh saǵatta tazartyldy, negizgi sý basýlar bes saǵatta joıyldy. Jumystarǵa 270 adam men 41 birlik arnaıy tehnıka jumyldyrylyp, 15 qulaǵan aǵash shyǵaryldy. Búgingi kúnge 17:00-ge qaraı 1300-den az abonent elektr qýatynsyz qalyp otyr, qalpyna keltirý jumystary jalǵasýda.
Glýbokoe aýdanynda da elektr qýatynda aqaýlar boldy, biraq qazir elektrmen jabdyqtaý qalpyna keltirildi, degenmen keıbir úılerde kerneý áli de álsiz.
Oblys ákimi joldardy, trotýarlardy jáne qoǵamdyq aýmaqtardy tazartýdy barynsha qysqa merzimde aıaqtaýdy tapsyrdy. Eki kún ishinde keltirilgen zalaldyń baǵasyn usyný qajet. Polısıa qyzmetkerleri qoǵamdyq tártipti qamtamasyz etip, avarıalyq ýchaskelerde qaýipsizdikti kúzetip, azamattardyń qaýipti aımaqtarǵa kirýin shekteýi tıis. Sondaı-aq aýdan jáne oblys ortalyǵy ákimderine elektrmen jabdyqtaýdy qalpyna keltirýdi qysqa merzimde aıaqtaý mindeti qoıyldy.